കുഞ്ഞിലേ ഓണമാണ് ഓണം

ഓണം ഓർമ്മയിൽ ആദ്യ പ്രസാദ്

- നിരഞ്ജന ഇന്ദു

ആദ്യയ്ക്ക് ഓണം എന്ന് പറഞ്ഞാൽ മമ്മി ഉണ്ടാക്കുന്ന സ്വാദിഷ്ടമായ വിഭവങ്ങളാണ്. ഓരോ ഓണക്കാലമാവുമ്പോഴും നൂറനാടിൽ ഓടി നടന്നു ഓണം ആഘോഷിച്ചതും വയർ നിറയെ സ്വാദിഷ്ടമായ ഭക്ഷണം കഴിച്ചതിന്റെയും ഓർമ്മയിലേക്ക് ആദ്യ പോകും. ഈ വർഷത്തെ ഓണം കൊച്ചിയിൽ സുഹൃത്തുക്കൾക്കൊപ്പം ആഘോഷിക്കാൻ തയ്യാറെടുക്കുമ്പോഴും ആദ്യയുടെ മനസ്സിൽ നിറയെ മമ്മിയ്ക്കൊപ്പവും പപ്പയ്ക്കൊപ്പവും ആഘോഷിച്ച ഓണ ഓർമ്മകളാണ് നിറഞ്ഞു നിൽക്കുന്നത്. മുഖത്ത് നിറഞ്ഞ ചിരിയോട് ആദ്യ ഓണവിശേഷങ്ങൾ പറഞ്ഞു തുടങ്ങി......

അമ്മവീടായ നൂറനാട്ടിലെ ഓണമാണ് എന്റെ ജീവിതത്തിലെ ഏറ്റവും മനോഹരമായ ഓണക്കാലം. തിരുവോണത്തിന്റെ അന്നുപോലും എന്നെ വീട്ടിൽ കിട്ടില്ല. ഞങ്ങൾ കൂട്ടുക്കാർ എല്ലാം കൂടി ക്ലബ്ബിൽ ഓണപരിപാടിയുടെ ഓട്ടത്തിലായിരിക്കും. മാമനും മാമന്റെ ഫ്രണ്ട്സുമൊക്കെയായിരിക്കും ഓണപ്പരിപാടികളുടെ മേൽനോട്ടം. ഓണക്കളികളും ഓണപ്പാട്ടും എന്തിന് ഓണത്തല്ല് വരെ ഞങ്ങളുടെ ഓണപ്പരിപാടിയിൽ ഉണ്ടാകും. ഓരോ മത്സരത്തിന് ഫസ്റ്റ് വാങ്ങാൻ ഒരു സ്പിരിറ്റ് ആണ്. ഇപ്പോൾ അവിടെ അങ്ങനെ ഒന്നുമില്ല. ക്ലബ്ബും പരിപാടികളൊന്നുമില്ല. അതെല്ലാം ഒന്നുകൂടെ റീ ക്രിയേറ്റ് ചെയ്യണമെന്ന് ആഗ്രഹം ഉണ്ട്. പക്ഷേ അതൊന്നും ഇനി നടക്കില്ല. അന്ന് പരിപാടി നടത്തിയവരും ഓടിനടന്ന സുഹൃത്തുക്കളും ഒന്നും അവിടെയില്ല. തിരിച്ചു പോകാൻ ആഗ്രഹിക്കുന്ന ഒരു ഓണക്കാലം അതാണ്. ഇപ്പോഴും ആലോചിക്കുമ്പോൾ മനസ്സിന് കുളിർമ നൽകുന്ന ഒരുപിടി ഓർമ്മകൾ സമ്മാനിച്ച ഓണക്കാലം.