പോലീസ് വേഷങ്ങളോട് മടുപ്പില്ല കലാഭവൻ ഷാജോൺ

ശരത് സുബ്രഹ്മണ്യൻ

എന്നിലേക്ക് വരുന്ന എല്ലാ കഥാപാത്രങ്ങളോടും പ്രത്യേക രീതിയിലുള്ള അറ്റാച്ച്മെന്റ് എല്ലായ്പ്പോഴും ഉണ്ടാകാറുണ്ട്. ചിലതിനോടൊക്കെ ഒരു പ്രത്യേക സ്നേഹവും തോന്നാറുണ്ട്. അതിന് ചില കാരണങ്ങളുമുണ്ട്..... തന്റെ സിനിമാവിശേഷങ്ങളെക്കുറിച്ച് മനസ്സ് തുറക്കുകയാണ് മലയാളികളുടെ പ്രിയതാരം കലാഭവൻ ഷാജോൺ.

വ്യത്യസ്തമായ കഥാപാത്രങ്ങൾ ലഭിക്കുന്ന ഏതൊരു സിനിമയും ഹൃദയത്തോട് ചേർത്തുവെയ്ക്കുന്നവയാണ്. അതിലെ എല്ലാ താരങ്ങളും സംവിധായകനും തിരക്കഥാകൃത്തും ക്യാമറാമാനും അങ്ങനെയെല്ലാം ആ ചിത്രത്തിനോടുള്ള പ്രത്യേക അടുപ്പത്തിന്റെ കാരണങ്ങളാണ്. ഇതേ ഇഷ്ടങ്ങളെല്ലാം യോജിച്ചുവന്ന ഒരു ചിത്രമാണ് ഈയിടെ റിലീസായ ഇനി ഉത്തരം. ഷാജോണിന്റെ സിനിമാവിശേഷങ്ങളിലേക്ക്...

അന്ന് മുതൽ ഇന്ന് വരെ

1999ൽ പുറത്തിറങ്ങിയ മൈ ഡിയർ കരടി എന്ന ചിത്രത്തിലൂടെയാണ് കരിയർ ആരംഭിച്ചത്. അന്നുതൊട്ട് ഇന്നുവരെയും നിരവധി കഥാപാത്രങ്ങൾ ചെറുതും വലുതുമായി ലഭിച്ചു. ധ്യാൻ ശ്രീനിവാസൻ ചിത്രം ഐഡി എന്ന ചിത്രത്തിന്റെ ഷൂട്ടിംഗാണ് ഇപ്പോൾ പൂർത്തിയാക്കിയിരിക്കുന്നത്. രാമലീല എന്ന ഹിറ്റ് ചിത്രത്തിന് ശേഷം അരുൺ ഗോപി ദിലീപ് കൂട്ടുകെട്ടിൽ പിറക്കുന്ന ഏറ്റവും പുതിയ ചിത്രത്തിലാണ് ഇനി ജോയിൻ ചെയ്യാനുള്ളത്. വലിയ ക്യാൻവാസിൽ ഒരുങ്ങുന്ന ചിത്രത്തിലെ ഒരു മുഴുനീള കഥാപാത്രമാണ് കൈകാര്യം ചെയ്യുന്നത്.

സീരിയസ് കഥാപാത്രങ്ങൾ ചെയ്യണമെന്ന് തോന്നിത്തുടങ്ങിയോ? സിനിമ എന്നത് ഏറെ ഇഷ്ടപ്പെട്ട് ചെയ്യുന്ന ഒരു ജോലിയാണ്. വ്യത്യസ്തമായ കഥാപാത്രങ്ങൾ ലഭിക്കുക എന്നതാണ് ഏതൊരു നടന്റെയും ആഗ്രഹം. ചെയ്യുന്ന കഥാപാത്രങ്ങളെല്ലാം ജനങ്ങൾ ഇഷ്ടപ്പെടുന്നു എന്നറിയുന്നതിൽ വളരെ സന്തോഷമുണ്ട്. സീരിയസ് കഥാപാത്രങ്ങളും നർമ്മം കലർന്ന കഥാപാത്രങ്ങളും ലഭിച്ചാൽ ഏറെ ഇഷ്ടപ്പെട്ട് തന്നെയാണ് അഭിനയിക്കാറുള്ളത്. അതുകൊണ്ട് സീരിയസ് കഥാപാത്രങ്ങൾ ഒഴിവാക്കണമെന്ന ചിന്ത ഇതുവരെ ഉണ്ടായിട്ടില്ല. മലയാളത്തിലെ താരരാജാക്കന്മാർക്കൊപ്പമെല്ലാം അഭിനയിക്കാൻ അവസരം ലഭിച്ചിട്ടുണ്ട്. എന്നാൽ ഇപ്പോഴത്തെ യുവതലമുറയ്ക്കൊപ്പം അഭിനയിക്കാൻ എനിക്കധികം അവസരം ലഭിച്ചിട്ടില്ല. ഫഹദിനൊപ്പം അഭിനയിക്കാൻ ഇതുവരെയും സാധിച്ചില്ല. അത് ഒരു വലിയ സങ്കടം തന്നെയാണ്.

ദൃശ്യത്തിലെ സഹദേവന് ശേഷം സ്ഥിരമായി പോലീസ് വേഷം കൈകാര്യം ചെയ്യുമ്പോൾ മടുപ്പ് അനുഭവപ്പെട്ടിട്ടുണ്ടോ ?