തടാകമാകാത്ത അഭിനയനദിപോലെ മമ്മൂട്ടി

ഒരു പ്രത്യേക ശൈലിയുള്ള കഥാപാത്രങ്ങളിൽ ഒരിക്കലും തന്റെ അഭിനയത്തെ തളച്ചിടാൻ ഒരിക്കലും മമ്മൂട്ടി ശ്രമിച്ചിരുന്നില്ല.

കാലങ്ങളുടെ മാറ്റത്തിനനുസരിച്ച് നിലകൊള്ളുകയും നിത്യം നവഭാവുകത്വത്തോടെ പ്രത്യക്ഷപ്പെടുകയും ചെയ്യുന്ന നടനാണ് മമ്മൂട്ടി. ആ അതിജീവനമാണ് തന്റെ കരിയറിൽ മമ്മൂട്ടിയെ എന്നും ശ്രദ്ധേയനാക്കിയിട്ടുള്ളത്.  കാലപ്രത്യേകതയ്ക്കനുസരിച്ച് അതാതു കാലത്തിന്റെ കഥാപാത്രങ്ങളിലൂടെ വേഷങ്ങളോടെ, അതി ലുപരി ശൈലിയോടെ വെള്ളിത്തിരയിൽ പ്രത്യക്ഷപ്പെടാൻ കഴിയുന്നിടത്താണ് മമ്മൂട്ടി എന്ന നടൻ വിജയം കണ്ടെത്തുന്നത്. ആ വിജയം അഭിനയ വ്യത്യസ്തത കൊണ്ട് ചേതോഹരമാക്കാൻ രണ്ടായിരത്തി ഇരുപത്തിരണ്ടിലും അദ്ദേഹത്തിന് കഴിഞ്ഞു. ഭീഷ്മ പർവ്വത്തിൽ തുടങ്ങി പുഴുവിലൂടെ റോഷാക്കിലെത്തിയ മമ്മൂട്ടിയുടെ അഭിനയം കൃത്യം അളവുകൾക്ക നുസരിച്ചുള്ളതായിരുന്നു. ഒട്ടും തുളുമ്പാതെയും കുറയാതെയും ഇരിക്കാത്തവിധം പ്രേക്ഷകർ ആഗ്രഹിച്ചതനുസരിച്ച് പരിപാകമായിരുന്നു. അതുകൊണ്ടുതന്നെ രണ്ടായിരത്തി ഇരുപത്തിരണ്ട് മമ്മൂട്ടിയുടെ തിളക്കമാർന്ന അഭിനയം മാറ്റുരച്ച വർഷം കൂടിയാകുന്നു.