എന്തിന് മടുക്കണം? സിനിമയോട് കമ്പമാണ് ഷൈൻ ടോം ചാക്കോ

സിനിമയെ ഇത്രയധികം ഇഷ്ടപ്പെട്ടതുകൊണ്ടാണ് ഞാൻ ഈ മേഖലയിൽ എത്തിയത്. ഇഷ്ടപ്പെട്ട് ജോലി ചെയ്യുന്നതുകൊണ്ട് മാത്രമാണ് കഠിനമായി അധ്വാനിക്കുന്നത്. ഒത്തിരിയേറെ ആഗ്രഹിച്ച നിമിഷങ്ങൾ വരുമ്പോൾ മടിപിടിച്ചു മാറിയിരിക്കുകയല്ലല്ലോ വേണ്ടത്. നമുക്ക് ലഭിക്കുന്ന സൗഭാഗ്യങ്ങളൊക്കെ ഉപയോഗപ്പെടുത്തുകയാണ് വേണ്ടത്.

സിനിമയിലാണെങ്കിലും ഇൻറർവ്യൂകളിൽ ആണെങ്കിലും ആരെയും മടുപ്പിക്കാതെ എനർജറ്റിക്കായി തുടരുന്നത് എങ്ങനെയാണ്

ഷൈൻ ടോം: ചെയ്യുന്ന ജോലിയിൽ സന്തോഷം കണ്ടെത്തുക. ഞാൻ ആഗ്രഹിച്ചു വന്ന ഒരു മേഖലയാണിത്. അതുകൊണ്ടുതന്നെ ഞാൻ ചെയ്യുന്ന ജോലിയെ ഒരുപാട് സ്നേഹിക്കുന്നുണ്ട്. തുടർച്ചയായി വർക്കുകൾ ചെയ്യുമ്പോൾ മടുപ്പുകൾ തോന്നാറുണ്ട്. ആ സമയം എനിക്ക് വേണ്ടി കുറച്ച് സമയം കണ്ടെത്തി വെറുതെ ഇരിക്കും. ജോലിയില്ലാത്ത സമയത്ത് ചില്ലിംഗ് ആണ് പ്രധാനം. ചില്ലിംഗ് എന്ന് പറയുമ്പോൾ വേറെ അർത്ഥത്തിൽ എടുക്കേണ്ട, വെറുതെ ഇരിക്കുക, സമയം ആസ്വദിക്കുക എന്ന് മാത്രമാണ് ഉദ്ദേശിച്ചത്.

ഇന്റർവ്യൂകളിൽ നിന്ന് സിനിമകളിലേക്ക് വരുമ്പോൾ ഷൈൻ എങ്ങനെയാണ് കഥാപാത്രമായി മാറുന്നത്?

ഷൈൻ ടോം: സിനിമകളിലേക്ക് വരുമ്പോൾ ഞാൻ പൂർണ്ണമായും ആ കഥാപാത്രമാകും. കഥയും കഥാപാത്രവുമായി മാത്രമേ സിനിമയിൽ നിൽക്കേണ്ടതുള്ളൂ. അവിടെ നായകനോ നായികയോ വില്ലനോ ഇല്ല. കഥയും കഥാപാത്രവുമാവുക എന്നതാണ് പ്രധാനം. 

സംവിധായകർ പറഞ്ഞു തരുന്ന വിവരണത്തേക്കാളുപരി ഷൈൻ എങ്ങനെയാണ് ഒരു കഥാപാത്രമാകാൻ തയ്യാറെടുപ്പ് നടത്തുന്നത്?