മാറ്റങ്ങൾ കൈക്കൊണ്ട പാൻ ഇന്ത്യൻ മുഖങ്ങൾ

ഭാഷയുടെയും ദേശത്തിന്റെയും അതിരുകൾ ഭേദിക്കുന്ന ഒരു വിനിമയ സാധ്യത ഇന്ത്യൻ സിനിമയിലേക്ക് കൈവന്നുകൊണ്ടിരിക്കുകയാണ്

- അപ്പൂസ് കെ.എസ്

ഭാഷയുടെയും ദേശത്തിന്റെയും അതിരുകൾ ഭേദിക്കുന്ന ഒരു വിനിമയ സാധ്യത ഇന്ത്യൻ സിനിമയിലേക്ക് കൈവന്നുകൊണ്ടിരിക്കുകയാണ്. പല ഭാഷകളിൽ സംസാരിക്കുന്ന സിനിമകളാണ് ഇപ്പോൾ ഇന്ത്യൻ സിനിമാവിപണിയെ നയിക്കുന്നത്. ആകർഷകമായ ഹീറോയിക് മെറ്റീരിയലുകൾ സൃഷ്ടിച്ചാണ് ഈ അടുത്തകാലത്ത് ദക്ഷിണേന്ത്യൻ സിനിമ ബോളിവുഡ്ഡിന്റെ വരെ ശ്രദ്ധ പിടിച്ചു പറ്റിയത്. അമാനുഷികനായകന്മാർ പോലും കേന്ദ്ര കഥാപാത്രങ്ങളാകുന്ന ഭാഷയുടെയും ദേശത്തിന്റെയും അതിരുകൾ മറന്നാണ് സിനിമ പാൻ ഇന്ത്യൻ ലെവലിലേക്ക് കടക്കുന്നത്. കഴിഞ്ഞ അഞ്ച് വർഷത്തിനിടെ രൂപപ്പെട്ട ഈ ഇന്ത്യൻ സിനിമയുടെ സിരാകേന്ദ്രമായ ബോളിവുഡിനെപ്പോലും വിറപ്പിച്ചിരുന്നു. ബോളിവുഡ് കഴിഞ്ഞാൽ ഇന്ത്യയിലെ ഏറ്റവും ശക്തമായ ചലച്ചിത്ര വിപണന കേന്ദ്രമാണ് തെലുങ്കും തമിഴും. ഓരോ താരങ്ങളും ഭാഷാഭേദമെന്യേ അഭിനയിച്ചതോടെ സിനിമാവ്യവസായത്തിൽ വലിയ സാധ്യതകളുയർന്നു. ഇതിന് നിമിത്തമായത് പ്രശാന്ത് നീലിന്റെ  കെ.ജി.എഫ് ആയിരുന്നു.

മാറ്റിനിർത്തപ്പെട്ടിരുന്ന ഭാഷാചിത്രങ്ങൾ ഇന്ന് അതിരുകളില്ലാതെ പ്രാദേശികമായി കഥ പറയുകയാണ്. ബാഹുബലിയും പുഷ്പയും കെ.ജി.എഫും ആർ.ആർ.ആറും, പൊന്നിയിൽ സെൽവനുമെല്ലാം കേരളത്തിൽ വലിയൊരു കളക്ഷൻ നേടി വിജയിച്ചതിന് കാരണം ആരാധകർക്ക് ഭാഷ നോക്കാതെയുള്ള, അതിരുകളില്ലാതെയുള്ള സിനിമയോടുള്ള പ്രണയമാണ്. മലയാള സിനിമയും പാൻ ഇന്ത്യൻ ലെവലിലേക്ക് ഉയരുകയാണ്. ഇതര സംസ്ഥാനങ്ങളിലും നമ്മുടെ നായകന്മാരുടെ ബോക്സ് ഓഫീസ് മൂല്യം വളർന്നത് വളരെ ചുരുങ്ങിയ വർഷം കൊണ്ടാണ്. അതുകൊണ്ടുതന്നെ മലയാള സിനിമയുടെ ഭാവി ഇനിയും കുതിക്കും എന്നത് സംശയമില്ലാതെ പറയാം. പാൻ ഇന്ത്യൻ നായകൻ ദുൽഖറും തമിഴിൽ നിന്നും ധനുഷും, മാറ്റങ്ങൾ കൈക്കൊണ്ട് പൃഥ്വിരാജും ദക്ഷിണേന്ത്യൻ സിനിമയെ കൈപിടിച്ചുയർത്തുകയാണ്.

പാൻ ഇന്ത്യൻ സിനിമയുടെ താരപ്രഭയിൽ ദുൽഖർ  സൽമാൻ