തുടക്കം കളറാക്കി

മഞ്ഞുമൽ ബോയ്സിന്റെ റിലീസിന് മുന്നോടിയായി സംഗീതസംവിധായകൻ സുഷിൻ ശ്യാം മഞ്ഞുമൽ ബോയ്സ് മലയാള സിനിമയുടെ സീൻ മാറ്റുമെന്ന് പറഞ്ഞിരുന്നു. ആ കോൺഫിഡൻസിൽ തന്നെയാണ് മലയാള സിനിമയുടെ തുടക്കം. 2023 മലയാള സിനിമയെ സംബന്ധിച്ച് മോശം വർഷമായിരുന്നു. ഒരുപാട് സിനിമകൾ ഇറങ്ങിയ വർഷം. എന്നാൽ അതിൽ വിരലിലെണ്ണാവുന്ന സിനിമകൾ മാത്രം വിജയിച്ച വർഷം. പരാജയ സിനിമകൾക്ക് കാരണം റിവ്യൂവേഴ്സെന്ന് ഒരു കൂട്ടർ പറയുന്നു. മലയാള സിനിമയ്ക്ക് വലിയ അടികിട്ടിയ വർഷമായിരുന്നു 2023. എങ്കിൽ 2024 രണ്ടും കൽപ്പിച്ചതെന്ന് പറയേണ്ടി വരും. ഫെബ്രുവരി മാസത്തിൽ നാല് ഹിറ്റുകൾ മലയാള സിനിമയുടെ സീൻ മാറ്റി.

പ്രേമലു ഹിറ്റലു

പേരിൽ തന്നെ വ്യത്യസ്തതയുള്ള ചിത്രമായിരുന്നു പ്രേമലു. തണ്ണീർമത്തൻ ദിനങ്ങൾ, സൂപ്പർ ശരണ്യ എന്നീ ഹിറ്റ് ചിത്രങ്ങൾക്കുശേഷം ഗിരീഷ് എ.ഡി സംവിധാനം ചെയ്ത പ്രേമലു തിയേറ്ററുകളിൽ എത്തുന്നതിന് മുമ്പുതന്നെ പ്രേക്ഷകർക്കിടയിൽ അമിതപ്രതീക്ഷയുടെ ഭാരം നൽകിയിരുന്നു. പ്രതീക്ഷകൾക്ക് അപ്പുറമായിരുന്നു പ്രേമലു പ്രേക്ഷകരെ ആഹ്ലാദത്തിലാക്കിയത്. യുവതലമുറകളുടെ ഇഷ്ടജോഡികളായ നസ്സനും മമിത ബൈജുവും ഒന്നിച്ചപ്പോൾ കേരള ബോക്സ് ഓഫീസ് ഇളക്കി മറിച്ചു.

ഭാവനാ സ്റ്റുഡിയോസിന്റെ ബാനറിൽ ദിലീഷ് പോത്തൻ, ഫഹദ് ഫാസിൽ, ശ്യാം പുഷ്ക്കരൻ എന്നിവർ ചേർന്നാണ് ചിത്രം നിർമ്മിച്ചത്. പത്തനംതിട്ടക്കാരിയായ റീനുവും ആലുവക്കാരനായ സച്ചിനും വളരെ യാദൃച്ഛികമായി ഹൈദരാബാദിൽ നിന്ന് കണ്ടുമുട്ടുകയും ഇവരുടെ സൗഹൃദവും പ്രണയവുമാണ് പ്രേമലുവിലൂടെ രസകരമായി പറയുന്നത്. നസ്ലനും മമിതയ്ക്കുമൊപ്പം സംഗീത് പ്രതാപ്, ശ്യാം മോഹൻ, അഖില ഭാർഗ്ഗവൻ, അൽതാഫ് സലിം, മീനാക്ഷി രവീന്ദ്രൻ തുടങ്ങിയവരും പ്രേമലുവിന്റെ ഭാഗമായി. കേരളത്തിൽ ചിത്രം കത്തിക്കയറുമ്പോഴാണ് തെലുങ്കിലേക്ക് ചിത്രം മൊഴിമാറ്റം ചെയ്യപ്പെടുന്നത്. സംവിധായകൻ എസ്.എസ്. രാജമൗലിയുടെ മകൻ കാർത്തികേയനാണ് വിതരണത്തിനെത്തിച്ചത്.

അന്വേഷിപ്പിൻ കണ്ടെത്തും