ராணுவ வீரன்!

"தன் கணவன் ராணுவத்தில் இருந்து லீவில் வருவதை எண்ணி காத்திருந்த சரளாவுக்கு என்ன நேர்ந்தது?"

- வே.மதியழகன்

"பெரிய வீட்டு மருமகளே, உனக்கு கடிதம் வந்திருக்கிறது."  என்ற குரல் கேட்டு பொதுக் குழாயில் தண்ணீர் பிடித்துக் கொண்டிருந்த சரளா தலையை திருப்பி பார்த்தாள். அவள் மாமனார் தான் கிராமத் தலைவர். ஊரில் எல்லோருககும் அவரிடம் மதிப்பும், மரியாதையும் அதிகம். அவருடைய இரண்டு மகன்களும் ராணுவத்தில் பணிபுரிகிறார்கள். மனைவி குழந்தைகளின் சிறுவயதிலேயே காலமாகி விட்டாள். மூத்த மகன் ராகவின் மனைவி தான் சரளா. சென்ற வருடம் தான் இருவருக்கும் திருமணம் ஆனது. மணமான 1 மாதத்திலேயே ராகவிற்கு ராணுவத்திலிருந்து அழைப்பு வர அவன் சென்று விட்டான். இளைய மகனுக்கு இன்னும் திருமணம் ஆகவில்லை.

பழைய நினைவுகளிலிருந்து அவளை மீட்டது தபால்காரரின் குரல், "சரளா அதிசயமாக உன் பெயருக்கு கடிதம் வந்திருக்கிறது. உன்னை இங்கே பார்த்ததால் வீட்டிற்கு செல்லாமல் உன்னிடம் இங்கேயே கொடுக்கலாம் என்று தான் கூப்பிட்டேன்.'' என்று கடிதத்தை அவளிடம் நீட்டினார். படபடக்கும் மனதுடன் கடிதத்தை வாங்கிப் பார்த்தாள். அவள் கணவன் ராகவ் தான் எழுதியிருந்தான். மகிழ்ச்சியாக கடிதத்தைப் பிரித்தாள். இதற்கு முன் ஒரே ஒருமுறை பஞ்சாயத்து போர்டு ஆபீசில் அவளை அழைத்துப் பேசினான். ஆனால் சுற்றிலும் அவள் மாமனாரும் மற்றவர்களும் இருந்ததால் அவன் கேட்டதற்கு ஆமாம், இல்லை என்று மட்டுமே பேச முடிந்தது. ஆனால் கடிதத்தைப் பிரித்தவள் திகைத்தாள். கடிதம் ஆங்கிலத்தில் எழுதி இருந்தது. அவள் விழிப்பதை பார்த்து தபால்காரரோ, "கொடும்மா நான் படித்து சொல்கிறேன்" என்று வாங்கி படித்தார். அதைக் கேட்ட சரளாவின் கண்களில் ஆனந்த கண்ணீர்.