എനിക്കായി കരുതിയ വേഷങ്ങൾ...

ഗാനരംഗങ്ങളുടെ ചിത്രീകരണത്തിലെല്ലാം ശശിയിലെ ചിത്രകാരന്റെ വൈഭവംകാണാം...

- വിധുബാല

വിധു...ഈ സിനിമ കൂടി ചെയ്തിട്ട് നീ അഭിനയം നിർത്തിക്കോ... ശശി പലവട്ടം എന്നോട് പറഞ്ഞു. പക്ഷേ, എന്റെ തീരുമാനത്തിൽ മാറ്റമില്ലായിരുന്നു. ഒരിക്കലും സിനിമാഭിനയം മടുപ്പുണ്ടാക്കിയിട്ടല്ല, അന്നങ്ങനെയൊരു തീരുമാനമെടുത്തത്. വിവാഹത്തിന് മുൻപേ അഭിനയജീ വിതം മതിയാക്കാം എന്ന് മനസ്സ് പറഞ്ഞു. ആ തീരുമാനത്തിന് പിന്നീട് ഇളക്കമുണ്ടായില്ല. പക്ഷേ, ഐ. വി. ശശി എന്നും എന്റെ നല്ല സുഹൃത്തായിരുന്നു. എന്തും തുറന്നു പറയാവുന്ന അടുത്ത സുഹൃത്തുക്കളിലൊരാൾ.

നാൽപ്പത്തിയെട്ടു വർഷങ്ങൾക്ക് മുൻപാണ്. ഒരു സന്ധ്യയ്ക്ക് മഹാലിംഗപുരത്തെ സരസ്വതി സ്ട്രീറ്റിലെ വീട്ടിലേക്ക് എന്റെ അച്ഛൻ പ്രൊ. ഭാഗ്യനാഥിനെ കാണാനായി വന്ന ശശിയെ ഞാനിപ്പോഴും ഓർക്കുന്നു. സിനിമയിൽ കലാ സംവിധായകനായിരുന്ന ശശിയെ ഞാനാദ്യമായി കാണുന്നതും അന്നാണ്. “നല്ലൊരു സ്ക്രിപ്റ്റ് കയ്യിലുണ്ട്. ഒരു പ്രൊഡ്യൂസറെ കിട്ടിയിരുന്നെങ്കിൽ സിനിമ ചെയ്യാമായിരുന്നു. അച്ഛനോട് ശശി പറഞ്ഞു.