മനം കവരും മൈക്രോ ലോട്ടസ്

 അകത്തളങ്ങളിൽ കുഞ്ഞൻ താമരയും പരീക്ഷിക്കാം

- ഡോ. ഷീന എ.

താമരയിലെ കുഞ്ഞന്മാരാണ്  മൈക്രോലോട്ട് അഥവാ മിനിയേച്ചർ ലോട്ടസ്. ചെറിയ ബൗളുകളിൽ വളർത്താൻ പറ്റിയ ഇവ ബൗൾ ലോട്ടസ് എന്നും അറിയപ്പെടുന്നു. വെയിൽ വേണ്ടതിനാൽ പൂർണമായും അകത്തളച്ചെടിയായി വളർത്താനാവില്ലെങ്കിലും സിറ്റൗട്ടിലും ബാൽക്കണിയിലുമൊക്കെ പരിപാലിക്കാം.

കുഞ്ഞൻ താമരയെ വികസിപ്പിച്ചെടുത്തത് ചൈനയിലാണ്. സ്പാർ എന്നാണ് ആദ്യ മൈക്രോ ലോട്ടസിന്റെ പേര്. വലുപ്പമനുസരിച്ചു താമര ഇനങ്ങളെ നാലായി തിരിച്ചിരിക്കുന്നു. 6 ഇഞ്ചിനു താഴെയുള്ളവയാണ് കുഞ്ഞന്മാർ. കുഞ്ഞൻ താമരയുടെ ഇലകളും പൂക്കളും കിഴങ്ങുകളും ചെറുതായിരിക്കും. യഥാർഥ മൈക്രോ ലോട്ടസ് ഇനങ്ങൾ പ്രകൃത്യാതന്നെ കുഞ്ഞന്മാരാണ്. വലിയ ചട്ടികളിൽ വളർത്തിയാലും കുഞ്ഞന്മാരായേ വളരൂ.