നൂറുമേനി വിളവിൽ സ്കൂളിനു പുതുജന്മം

അടച്ചുപൂട്ടലിന്റെ വക്കിലെത്തിയ രാജാക്കാട് പഴയവിടുതി സർക്കാർ യുപി സ്കൂൾ കൃഷിയിലൂടെ മികവിന്റെ പാതയിൽ

- ഐജോ

ഒരു കാലത്ത് വിദ്യാർഥികളുടെ എണ്ണം കുറഞ്ഞതിനാൽ അടച്ചുപൂട്ടലിന്റെ വക്കിലെത്തിയ സർക്കാർ വിദ്യാലയം ഇന്ന് മികവിന്റെ പാതയിൽ. അതിനു നിമിത്തമായതു മണ്ണും കൃഷിയും. മണ്ണിൽ വിതച്ച വിത്ത് പത്തും ഇരുപതും അൻപതും നൂറും മേനി വിളഞ്ഞതിന്റെ ഫലം ഇടുക്കി ജില്ലയിലെ രാജാക്കാട് പഴയവിടുതി സർക്കാർ യുപി സ്കൂളിൽ എവിടെയും പ്രകടം. പ്രവേശന കവാടത്തിലൂടെ സ്കൂൾ മുറ്റത്തേക്കു പ്രവേശിക്കുമ്പോൾ ആരെയും ആകർഷിക്കും വിധത്തിൽ ബംഗാൾ ക്ലോക്ക് വൈൻ പൂപ്പന്തൽ കാണാം. ഈ പന്തലിലാണ് കുട്ടികൾ സ്കൂൾ അസംബ്ലിക്ക് അണിനിരക്കുന്നത്. എത്ര കടുത്ത വെയിലിലും കുട്ടികൾക്ക് തണലൊരുക്കുന്നു ഈ നീലവർണ പൂപ്പന്തൽ.