പ്രാണിപിടിയൻ ചെടികളുടെ മായാലോകം

പിച്ചർ മാത്രമല്ല, അലങ്കാരച്ചെടിയായി വളർത്താവുന്ന ഒട്ടേറെ പ്രാണിപിടിയൻ ഇനങ്ങൾ വിപണിയിൽ ഇന്നുണ്ട്

- ജേക്കബ് വർഗീസ് കുന്തറ 

കൊതുകിനെയും ഈച്ചയെയും കെണിയിൽ കുടുക്കി തിന്നുന്ന തനി മാംസഭുക്ക് ചെടികൾ! സസ്യലോകത്തെ വിചിത്ര വർഗമായ പ്രാണി പിടിയൻ ചെടികൾക്ക് ഇന്ന് അലങ്കാരച്ചെടികൾ എന്ന നിലയിൽ പ്രിയമേറുന്നു. ഇവയിൽ പിച്ചർ പ്ലാന്റ് മലയാളിക്കു പരിചിതമാണ്. എന്നാൽ, നമ്മുടെ ഉഷ്ണമേഖലാ കാലാവസ്ഥയിൽ നന്നായി വളരുന്ന ഒട്ടേറെ മറ്റു പ്രാണിപിടിയൻ ചെടികൾ ഇന്നു ലഭ്യമാണ്. എല്ലാം തന്നെ നേരിട്ട് വെയിൽ കിട്ടുന്നിടത്തേക്കു യോജിച്ചവയുമാണ്. ഉദാ: സറാസീനിയ അഥവാ ട്രംപെറ്റ്, ഡാസീറ അഥവാ സൺ ഡ്യൂ, ഡയോണിയ അഥവാ വീനസ് ഫ്ലൈ ട്രാപ്പ്, പികുല അഥവാ ബട്ടർ വർട്സ്.

വളം ചേർക്കാത്ത മിശ്രിതത്തിലാണ് മാംസഭോജി സസ്യങ്ങൾ വളർത്തേണ്ടത്, എങ്കിൽ മാത്രമേ ഇര പിടിക്കാനുള്ള അവയങ്ങൾ ഉൽപാദിപ്പിച്ച് ഇവ പ്രാണികളെ പിടിച്ചു തിന്നുകയുള്ളൂ. നന്നായി ഈർപ്പം തങ്ങിനിൽക്കുന്നിടങ്ങളാണ് ഇവയ്ക്ക് ഇഷ്ടമെന്നതിനാൽ വേനൽക്കാലത്ത് ഏറെ ശ്രദ്ധ വേണം. പിച്ചർ പ്ലാന്റിനെക്കുറിച്ച് ഈ പംക്തിയിൽ മുൻപു വിവരിച്ചിട്ടുള്ളതിനാൽ മറ്റ് ഇനങ്ങളുടെ സവിശേഷതകളും പരിപാലനരീതികളുമാകട്ടെ ഈ ലക്കത്തിൽ.