പ്ലാറ്റിനം വീട് നിസ്സാരക്കാരനല്ല

IGBC യുടെ 2024 ലെ പ്ലാറ്റിനം അവാർഡ് ലഭിച്ചത് കേരളത്തിലെ ഒരേ ഒരു വീടിനാണ്

- സോന തമ്പി

വീടിന്റെ മേക്കിങ് പാർട്ട് ഒന്നു മനസ്സിലാക്കിയാലോ... ഭാവിയിലെ കെട്ടിടങ്ങൾ ഹരിതനിർമാണ കോഡ് അനുസരിച്ചു വേണമെന്നത് നിർബന്ധമായിക്കൊണ്ടിരിക്കുകയാണ്. ഭൂമിയുടെ നിലനിൽപ്പിന് സുസ്ഥിര കെട്ടിട നിർമാണ രീതി അനിവാര്യമാണ്. പ്ലോട്ട് തിരഞ്ഞെടുക്കുന്നതു മുതൽ ഉപയോഗം വരെ പരമാവധി കുറച്ചു മാത്രം കാർബൺഡൈഓക്സൈഡ് പുറത്തുവിടുക എന്നതാണ് ഹരിത ഗൃഹങ്ങളുടെ നയം.

കാർബൺ ഫുട് പ്രിന്റ് കുറച്ചുള്ള നിർമാണ രീതികൾ വലിയൊരു പരിധി വരെ പിന്തുടരുകയും അത് കൃത്യമായി രേഖപ്പെടുത്തുകയും ചെയ്തു എന്നതാണ് ഈ വീടിന് ലഭിച്ച അംഗീകാരത്തിനു പിന്നിൽ.

ഈ അംഗീകാരത്തിന്റെ ക്രെഡിറ്റ് മുഴുവൻ അർഹിക്കുന്നത് വീട്ടുകാരിയും കോട്ടയം രാജീവ്ഗാന്ധി ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ആർക്കിടെക്ചർ വിഭാഗം അധ്യാപികയും അതിലുപരി വീടിന്റെ മൊത്തം ഡിസൈനും ചെയ്ത അർച്ചനയ്ക്കാണ്.

വെള്ളത്തിന്റെ സ്രോതസ്സ്

ഹരിത ഭവനത്തിനുള്ള ആദ്യത്തെ പടി ജലസ്രോതസ്സ് ആണ്. ഒരിക്കലും വറ്റാത്ത, മൂന്ന് മീറ്റർ വ്യാസമുള്ള കിണർ ആണ് ഈ പ്ലോട്ട് തിരഞ്ഞെടുക്കാൻ അർച്ചനയെ പ്രേരിപ്പിച്ചത്. വടക്കുകിഴക്ക് മൂലയിലാണ് ഈ കിണറിരിക്കുന്നത്. വീടുപണിക്ക് ആവശ്യമായ വെള്ളം മുഴുവനും എടുത്തത് ഈ കിണറിൽ നിന്ന്. മാത്രമല്ല, ടെറസിൽ വീഴുന്ന മഴവെള്ളം മുഴുവൻ പൈപ്പു വഴി ഭൂമിക്കടിയിൽ ഒരു റീചാർജ് പിറ്റി'ലേക്ക് കൊടുത്തിരിക്കുകയാണ്. ഈ കുഴിയിൽ കഴുകിയ ചരലും എംസാൻഡും ഒരടി പൊക്കത്തിലിട്ട് വശങ്ങൾ കെട്ടിയെടുത്തു. 30 ലീറ്റർ വരെ നല്ല മഴക്കാലത്ത് നിറയും. ഈ വെള്ളം മണ്ണിനടിയിലേക്കിറങ്ങി കിണർ റീചാർജിങ് നടക്കും. അങ്ങനെ മഴവെള്ളസംഭരണിയും കിണറും തമ്മിൽ യോജിപ്പിച്ചതിന് ഗ്രീൻ പ്രോട്ടോക്കോൾ അനുസരിച്ചുള്ള മുഴുവൻ പോയിന്റും ഈ വീട് കരസ്ഥമാക്കി.

ചെറിയ പ്ലിന്ത് ഏരിയ