ഇനിയും നമ്മൾ ആപ്പിലാകരുത്

നമ്മുടെ പരിചയത്തിലുള്ള ഒരാളെങ്കിലും ലോൺ ആപിൽ കുടുങ്ങിയിട്ടുണ്ട്. എളുപ്പത്തിൽ പണം ലഭിക്കുമെന്ന മോഹ വലയിൽ അകപ്പെട്ട് പിന്നീട് മാനഹാനി നേരിട്ടവർ. അതിൽ ചിലരെങ്കിലും ജീവിതം തന്നെ അവസാനിപ്പിച്ചു...

- രതീഷ് ആർ.മേനോൻ

എത്ര മുന്നറിയിപ്പ് നൽകിയാലും ഇൻസ്റ്റന്റ് ലോൺ ആപ്പുകൾ എന്ന ചതിയൻ ആപ്പുകളിലൂടെ വായ്പയെടുത്ത് കുടുങ്ങുന്നവരുടെ എണ്ണം ദിനംപ്രതി വർധിക്കുന്നു. കടുത്ത നിബന്ധനകൾ, കൂടിയ പലിശനിരക്ക് എന്നിവയൊന്നും തിരക്കിട്ട് വായ്പ തേടുന്നവർ ശ്രദ്ധിക്കാറില്ല. ഇൻസ്റ്റന്റ് ലോൺ ആപ്പുകളുടെ ചതിക്കുഴികൾ ഇനിയെങ്കിലും നാം തിരിച്ചറിയണം.

ചതിയിൽ വീഴുന്നത് സാധാരണക്കാർ 

അടിയന്തര സന്ദർഭത്തിൽ പണത്തിന് നെട്ടോട്ടമോടുന്നവരാണ് മിക്കവരും. ബാങ്കിലാണെങ്കിൽ രേഖകളും നൂലാമാലകളുമായി കയറിയിറങ്ങണം. ഇത്തരം സന്ദർഭത്തിൽ ആരെയും ആശ്രയിക്കാതെ പണം കടം എടുക്കാൻ സാധിക്കുന്ന സാഹചര്യങ്ങൾ തേടുന്ന സാധാരണക്കാരായ ചെറിയ ബിസിനസുകാരും വീട്ടമ്മമാരുമാണ് ലോൺ ആപ്പുകളെന്ന ചതിക്കുഴിയിൽ കൂടുതലും വീഴുന്നത്.

ഏകദേശം ആറു മാസം മുമ്പ് ഇത്തരം ആപ്പുകളെ റിസർവ് ബാങ്ക് ഇടപെട്ട് നിയന്ത്രിച്ചിരുന്നെങ്കിലും ഒരിടവേളക്കു ശേഷം അവ വീണ്ടും വ്യത്യസ്ത പേരുകളിൽ വ്യാപകമാകുകയാണ്. ഇത്തരം ആപ്പുകളുടെ ചതിക്കുഴികളെ അറിയാം.

 ക്രെഡിറ്റ് സ്കോർ പോലും ആവശ്യമില്ല

ഒരു ലോണെടുക്കാൻ ബാങ്കിനെയോ ഏതെങ്കിലും ധനകാര്യസ്ഥാപനത്തെയോ സമീപിച്ചാൽ നിങ്ങളുടെ എല്ലാ രേഖകളും ക്രെഡിറ്റ് സ്കോറും പരിശോധിക്കും. നമ്മെക്കുറിച്ചുള്ള സകല സാമ്പത്തികവിവരങ്ങളും പരിശോധിച്ചാണ് സിബിൽ സ്കോർ ലഭിക്കുന്നത്.

ഒരു മിനിമം സ്കോർ എങ്കിലും ഉണ്ടെങ്കിലേ ബാങ്കുകളും ധനകാര്യ സ്ഥാപനങ്ങളും ലോണും ക്രെഡിറ്റ് കാർഡും അനുവദിക്കൂ. എന്നാൽ, ഇൻസ്റ്റന്റ് ലോൺ ആപ്ലിക്കേഷനിൽനിന്ന് ലോൺ എടുക്കാൻ സിബിൽ സ്കോറിന്റെ ആവശ്യമില്ല. ഇത്തരത്തിൽ ആയിര ക്കണക്കിന് ആപ്ലിക്കേഷനുകളാണ് ഇന്നു ഗൂഗ്ൾ പ്ലേ സ്റ്റോറിലുള്ളത്. തേർഡ് പാർട്ടി വെബ്സൈറ്റുകളിലും മറ്റുമുള്ളത് വേറെയും.

നിയമവിരുദ്ധം ഈ ആപ്പുകൾ

ഇത്തരം ആപ്ലിക്കേഷനുകൾ ഒന്നുംതന്നെ സർക്കാറിന്റെ അനുവാദത്തോടെയോ റിസർവ് ബാങ്ക് ഓഫ് ഇന്ത്യയുടെ മാനദണ്ഡങ്ങൾ അനുസരിച്ചോ നിയമവിധേയമായി പ്രവർത്തിക്കുന്നവയല്ല. എന്നു കരുതി ഇതുപയോഗിച്ചാൽ നമുക്ക് നിയമപരമായി പ്രശ്നവും ഉണ്ടാകില്ല.

എന്നാൽ, ഇൻസ്റ്റന്റായി ലോൺ തരുന്നതിനൊപ്പം ഇത്തരം ആപ്പുകൾ ഇൻസ്റ്റന്റായിത്തന്നെ നമുക്ക് പണിതരാനും തുടങ്ങിയിട്ടുണ്ട്. അതെങ്ങനെയെന്ന് പരിശോധിക്കാം.

ചോദിച്ചത് 8000, കിട്ടിയത് 5200