കേരളത്തിന്റെ ഫിലിപ്പീനി മരുമക്കൾ

ഫിലിപീനിൽനിന്ന് കേരളത്തിന്റെ മരുമക്കളായി എത്തിയ നിരവധി പേർ ഇന്ന് ദുബൈയിലുണ്ട്. ഓണവും വിഷുവും തൃശൂർപൂരവുമെല്ലാം നമ്മെപോലെ അവർക്കും ഏറെ പ്രിയപ്പെട്ടതാണ്...

- അങ്കിത കുറുപ്പ്

ജൊനാലിൻ ഇന്ന് ജാനകിയാണ്, ഞങ്ങൾക്ക് രണ്ടു മക്കളുണ്ട്. തിരൂരങ്ങാടി സ്വദേശിയായ രവി കരുമാട്ട് തന്റെ പ്രിയതമയെക്കുറിച്ച് പറഞ്ഞുതുടങ്ങി... 17 വർഷങ്ങൾക്കു മുമ്പാണ് ജൊനാലിൻ എന്റെ കൈപിടിച്ച് ജാനകിയായി കേരളത്തിലെത്തിയത്. തങ്ങളുടെ സംസ്കാരങ്ങൾ തമ്മിൽ വ്യത്യാസമുണ്ടെങ്കിലും ജാനു എന്റെ കുടുംബാംഗങ്ങൾക്ക് വളരെ പെട്ടെന്നുതന്നെ പ്രിയപ്പെട്ടവളായി...

ജാനു മാത്രമല്ല ഫിലിപ്പീൻസിൽനിന്ന് കേരളത്തിന്റെ മരു മക്കളായി എത്തിയ നിരവധി പേർ ഇന്ന് ദുബൈയിലുണ്ട്. ഓണവും വിഷുവും തൃശൂർ പൂരവുമെല്ലാം നമ്മെപ്പോലെ അവർക്കും ഏറെ പ്രീയപ്പെട്ടതാണ്. തങ്ങളുടെ ജീവിതവും കടൽ കടന്നെത്തിയ കേരളത്തിന്റെ ഫിലിപ്പീനി മരുമക്കളെക്കുറിച്ചും രവി കരുമാട്ട് പറയുന്നു.

ദുബൈയിൽ തുടങ്ങിയ പരിചയം

 ദുബൈയിൽ വെച്ചാണ് ഞാനും ജാനകിയും ആദ്യമായി കാണുന്നതും പരിചയപ്പെടുന്നതും. ജാനകി ഇവിടെ ജോലി ചെയ്യുകയായിരുന്നു. സൗഹൃദത്തിൽ ആരംഭിച്ച ബന്ധം പിന്നീട് വിവാഹത്തിൽ എത്തുകയായിരുന്നു. മക്കൾക്കൊപ്പം ഞങ്ങൾ ദുബൈയിൽ സന്തോഷത്തോടെ ജീവിക്കുന്നു.

വിവാഹം മംഗളമായി കഴിഞ്ഞു

2006ൽ പരപ്പനങ്ങാടിയിൽ വെച്ചായിരുന്നു വിവാഹം. ബന്ധുമിത്രാദികളുടെ സാന്നിധ്യത്തിലായിരുന്നു ചടങ്ങുകൾ, സ്വാഭാവികമായും തുടക്കത്തിൽ ആശങ്കയുണ്ടായിരുന്നെങ്കിലും ഞങ്ങളുടെ ഉറച്ച തീരുമാനത്തിനു മുന്നിൽ അതെല്ലാം മറികടന്നു. ഇത് കുടുംബാംഗങ്ങൾക്കും ബോധ്യപ്പെട്ടതോടെ എല്ലാവരും ഞങ്ങൾക്കൊപ്പം നിന്നു. വിവാഹം മംഗളമായി കഴിഞ്ഞു.

സാമ്യതകളുള്ള കേരള-ഫിലിപ്പീനി സംസ്കാരം