കൈവിടരുത് ജീവിതം

എച്ച്.ഐ.വി വൈറസ് മൂലം ഉണ്ടാകുന്ന ഗുരുതര രോഗമാണ് എയ്ഡ്സ്. നേരത്തെ കണ്ടുപിടിച്ചാൽ പൂർണമായും നിയന്ത്രണവിധേയമാക്കാനും കഴിയും. രോഗവുമായി ബന്ധപ്പെട്ട തെറ്റിദ്ധാരണകൾ നീക്കാം, കരുതലോടെ ജീവിക്കാം...

ലോകത്ത് ആദ്യമായി എയ്ഡ്സ് (Acquired Immuno Deficiency Syndrome) കണ്ടത്തിയത് 1981ലാണ്. ന്യൂയോർക്കിലെ ആരോഗ്യ വിദഗ്ധരാണ് ശരീരത്തിന്റെ രോഗപ്രതിരോധശേഷി ഇല്ലാതാക്കി ജീവൻ അപകടത്തിലാക്കുന്ന ഈ രോഗാവസ്ഥയെ തിരിച്ചറിഞ്ഞത്. പിന്നീട് വിവിധ രാജ്യങ്ങളിൽ എയ്ഡ്സ് കണ്ടെത്തുകയും രോഗനിർണയം, ചികിത്സ എന്നിവക്കായുള്ള ഗവേഷണങ്ങൾ നടക്കുകയും ചെയ്തു. ഇതിന്റെ ഫലമായി 1985ൽ രോഗനിർണയത്തിനുള്ള എലിസ (ELISA) ടെസ്റ്റ് വികസിപ്പിച്ചെടുത്തു.

 ഹ്യൂമൻ ഇമ്യൂണോ ഡെഫിഷ്യൻസി വൈറസ് (HIV) ആണ് എയ്ഡ്സിന് കാരണമാകുന്നത്. എച്ച്.ഐ.വി ബാധിച്ചവർ കൃത്യസമയത്ത് രോഗനിർണയം നടത്തി ചികിത്സ ഉറപ്പാക്കിയില്ലെങ്കിൽ എയ്ഡ്സായി രൂപപ്പെടാം. ഈ അവസ്ഥയിൽ ശരീരത്തിന്റെ പ്രതിരോധ സംവിധാനം പൂർണമായും പരാജയപ്പെടുകയും വിവിധ രോഗാവസ്ഥകളിലേക്ക് നയിക്കുകയും ചെയ്യും. രോഗപ്രതിരോധ സംവിധാനത്തിൽ നിർണായക സ്ഥാനമുള്ള വെളുത്ത രക്താണുക്കളെ ദുർബലമാകുന്നതിനാൽ ക്ഷയരോഗം, മറ്റു സമാന അണുബാധകൾ തുടങ്ങിയവ വളരെ വേഗത്തിൽ ശരീര ത്തെ ബാധിക്കും.

എച്ച്.ഐ.വി പകരുന്നത്

പ്രധാനമായും സുരക്ഷിതമല്ലാത്ത ലൈംഗിക ബന്ധത്തിലൂടെയാണ് എച്ച്.ഐ.വി പകരുന്നത്. ലൈംഗിക വേളയിൽ ശരീരസ്രവങ്ങളുടെ കൈമാറ്റത്തിലൂടെ വൈറസ് പകരാം. കൂടാതെ രോഗബാധിതരിൽനിന്ന് രക്തം സ്വീകരിക്കുന്നതിലൂ ടെയും സുരക്ഷിതമല്ലാത്ത സിറിഞ്ചുകളുടെ ഉപയോഗത്തിലൂടെയും വൈറസ് ഒരാളിൽ നിന്ന് മറ്റൊരാളിലേക്ക് പകരാം. ലഹരി ഉപയോഗത്തിന് സിറിഞ്ചുകൾ സുരക്ഷിതമല്ലാതെ ഉപയോഗിക്കുന്നത് വൈറസ് പകരാൻ കാരണമാകാറുണ്ട്. മുലപ്പാൽ, ശരീരസ്രവങ്ങൾ എന്നിവയിലൂടെ എച്ച്.ഐ.വി പോസിറ്റിവായ അമ്മയിൽ നിന്ന് കുഞ്ഞിലേക്കും വൈറസ് ബാധിക്കുന്നു.

അക്യൂട്ട് എച്ച്.ഐ.വി

വൈറസ് ശരീരത്തിൽ പ്രവേശിച്ചാൽ 3-6 ആഴ്ചക്കകം ലക്ഷണങ്ങൾ പ്രകടമാകും. സാധാരണ പനിയുടെ ലക്ഷണങ്ങൾ മാത്രമാകാം ഈ ഘട്ടത്തിൽ അനുഭവപ്പെടുക. എന്നാൽ, എല്ലാവരിലും ഈ കാലയളവിൽ ലക്ഷണങ്ങൾ അനുഭവപ്പെടണമെന്നില്ല. അതുകൊണ്ട് തന്നെ ആദ്യ 14 ദിവസത്തിനുശേഷം നടത്തുന്ന പരിശോധനയിൽ ഫലം നെഗറ്റിവ് ആണെങ്കിൽ 90 ദിവസത്തിനുശേഷം ഒരു തവണകൂടി പരിശോധന നടത്തേണ്ടതുണ്ട്. എച്ച്.ഐ.വി പോസിറ്റിവാകുന്ന കാലയളവ് പലരിലും വ്യത്യാസപ്പെടാം എന്നതാണ് ഇതിനു കാരണം.