રોતલ વ્યક્તિના પ્રેમમાં ન પડાય!

પ્રેમ કે દાંપત્યજીવનમાં એકબીજા સામે પારદર્શક રહેવું જોઈએ કે તમારી સાચી લાગણીઓ જાહેર કરવી જોઈએ. વિશ્વાસનો સર્વોચ્ચ તબક્કો કહેવાય તેને, પરંતુ સતત રડતાં રહેતાં કે ફરિયાદ કરતાં રહેતાં લોકો જેન્યુઇન હોવાની શક્યતા ઘટી જાય છે. આવા રોતલકક્ષાએ લાગણીશીલ માણસો ઘણીવાર બહુ મોટા ઇમોશનલ મેનિપ્યુલેટર હોય છે. આવા માણસો તમને જ્યાં સુધી તેમના અગાઉના શિકાર વ્યક્તિની જેવી જ અસહાય પરિસ્થિતિમાં ન મૂકી દે ત્યાં સુધી તેમની સચ્ચાઈ તમે જોઈ શકતા નથી!

- ડો. મિતાલી સમોવા

જેન્શી આજે શહેરના નામી સાઇકોલૉજિસ્ટ નિજય ઉપાધ્યાય પાસે કાઉન્સેલિંગ માટે આવી હતી, જનરલી કપલ કાઉન્સેલિંગ બંને પતિપત્નીનું સાથે જ કરવામાં આવતું હોય છે. નિજયે પૂછ્યું કે તેનો પતિ હેનિશ સાથે કેમ નથી આવ્યો? જેન્સીએ કહ્યું કે એ માંડીને વાત કરશે.

જેન્સીએ પોતાની વાત મૂકવાનું શરૂ કર્યું, ‘હું અને હેનિશ છેલ્લાં દસ વર્ષથી એક જ ઑફિસમાં કામ કરીએ છીએ. હું તેના કરતાં ૩ વર્ષ નાની. ૭ વર્ષ પહેલાં હેનિશનાં દેવકી સાથે લગ્ન થયાં હતાં. એ ગૃહિણી હતી. લગ્નનાં બે વર્ષમાં જ બંને વચ્ચે મુશ્કેલીઓ ઊભી થઈ. હેનિશ મારી સમકક્ષ ઉંમરનો અને ઑફિસમાં ખૂબ મળતાવડો, બૉસનો પણ આજ્ઞાકારી અને કયારેય કોઈ મહિલા કર્મચારી સાથે તેનું વર્તન ખરાબ ન કહી શકાય તેવું. જેન્ટલમેન સમજી લો. તે તેના લગ્નજીવનમાં ઘટી રહેલી બધી ઘટનાઓથી ઑફિસમાં મને માહિતગાર કરતો રહેતો અને હું મિત્રભાવે તેને મોરલ સપોર્ટ આપતી. તે પહેલાંથી જ ખૂબ લાગણીશીલ પ્રકારનો માણસ હતો, દરેક લાગણીને એ બહુ ઇન્ટેન્સલી અનુભવતો..’

‘...દેવકીની ફરિયાદ કરતાં કરતાં રડી પડતો અને ક્યારેક દેવકીનાં મમ્મી દેવકીનો પક્ષ લઈને કશું કહેતાં હોય તો સખત ઘૃણા અને નફરત સાથે મને તેમની ફરિયાદ પણ કરતો. દેવકીને ઘરનું કામ કરતાં જોર આવે છે, તેના પૈસા પર તાગડધિન્ના જ કરવું છે અને તેના ઘરડાં માબાપ સાથે રહેવું નથી એવી ફરિયાદ કરેલી. દેવકીને તેના કૉલેજ ફ્રેન્ડ સાથે લફરું હતું એવું પણ એણે કહેલું, પણ ઓવરઑલ એ સારો માણસ હતો. તેના છૂટાછેડા થવાની પ્રક્રિયા ચાલુ જ હતી તે વખતે અને થઈ ગયા તેના ઘણા સમય સુધી તે એકદમ દેવદાસ જેવો થઈ ગયેલો..’