વિજ્ઞાન અને ટેક્નોલોજીમાં ભારતનું ભલું થઈ રહ્યું છે, પણ ધીમે ધીમે..

આઝાદી પછી ભારતે વિજ્ઞાન અને ટૅક્નોલૉજી ક્ષેત્રે હરણફાળ ભરી અને આજે રૉકેટ ગતિએ એ પ્રગતિ થઈ રહી છે. પછાત દેશોની તુલનાએ આપણે ઘણા આધુનિક છીએ તો પ્રગતિશીલ રાષ્ટ્રોની સરખામણીએ આપણું પછાતપણું ઊડીને આંખે વળગે એવું છે. આ વિરોધાભાસની અહીં માંડીને ચર્ચા કરવામાં આવી છે.

વિનોદ પંડ્યા

આ વીસ જુલાઈના રોજ દેશના એક અગ્રણી અખબારમાં ખબર છપાઈ કે અમેરિકાના પોર્ટલેન્ડ, ઓરેગોન ખાતેથી ૬૭ વર્ષની એક બીમાર સ્ત્રીને ખાસ એમ્બ્યુલન્સ વિમાન દ્વારા હૃદયની શસ્ત્રક્રિયા માટે ચેન્નઈ લાવવામાં આવી. રિક્યાવિક, આઇસલેન્ડ અને ઇસ્તંબુલ, તુર્કી ખાતે મધ્યમ કદના જેટ વિમાનમાં બળતણ ભરવા માટે ટૂંકા રોકાણો સહિત પ્રવાસમાં કુલ ૨૬ કલાક લાગ્યા. મહિલા મૂળ બેંગ્લુરુની છે. ભારતનો પાસપોર્ટ ધરાવે છે, તેથી અમેરિકામાં તબીબી વીમા બાબતમાં અડચણ હતી. બીજું કારણ એ અપાયું કે કુટુંબીઓને લાગ્યું કે એ મહિલાને અમેરિકામાં યોગ્ય અને પૂરતી સારવાર નહીં મળે. માટે તેઓએ એ બહેનને ચેન્નઈની એપોલો હોસ્પિટલમાં મોકલી આપ્યાં. વિમાનમાં ત્રણ તબીબો અને બે પેરામેડિક સાથે હતા. બેંગ્લુરુથી તબીબો એ મહિલા દરદીને લાવવા માટે ખાસ યુએસએ ગયા હતા. એર એમ્બ્યુલન્સનું ભાડું જ એક કરોડ છ લાખ રૂપિયાનું ચૂકવ્યું. તબીબો અને બીજાઓને ચૂકવવી પડશે તે રકમ અલગ. એ બહેન પર હવે ઓપન હાર્ટ સર્જરી થશે.

માત્ર તબીબી કુશળતાના કારણથી એ બહેનને ભારત લવાયાં હોય તો ગર્વ લેવા જેવી બાબત છે. જોકે બાબત અખબારી અહેવાલમાં દેખાય છે એટલી સરળ લાગતી નથી. અમુક શંકાઓને જન્મ આપે છે. આટલા ખર્ચમાં અમેરિકામાં શ્રેષ્ઠ, વર્લ્ડ ક્લાસ સારવાર મળે. છતાં ચેન્નઈ અને ભારતના તબીબીએ કુશળતા બાબતમાં જગતભરમાં ડંકો વગાડ્યો છે તેમાં બેમત નથી. ગૌરવની વાત એ છે કે મોટા ભાગના ભારતની કોલેજોમાં ભણીને તબીબો બન્યા છે અને અમેરિકા, યુરોપ, કેનેડામાં ભારતીય મૂળનો તબીબ મળે તો એ ભારતમાં જ ભણ્યો હોય તે સંભાવના વધુ રહે છે.

ભારત હજી કેટલીક બાબતોમાં પ્રથમ વિશ્વની અને કેટલીક બાબતોમાં ત્રીજા વિશ્વની હરોળમાં બેસેલું જણાય. આવા કેટલાક સમાચારો પ્રથમ વિશ્વના લોકોને અચંબામાં મૂકી દેતાં હોય છે