એક નેતાના 'મરદહસ્તે’ થયું ધ્વજારોહણ!

‘અમે પ્રચાર કરીશું કે દારૂબંધી તિજોરી 'ને અર્થતંત્રના હિતમાં નથી, એને દૂર કરવી જોઈએ. દારૂ કાં તો દારૂબંધી, બેમાંથી એકને દૂર કરવાનું વચન હું આજે આપું છું’

- હર્ષદ પંડ્યા ‘શબ્દપ્રીત’

ઑફિસમાંથી રવિવારે માંડ છુટકારો મળ્યાના આનંદને હું કૉફીના ઘૂંટ સાથે માણી રહ્યો’તો ત્યાં જ સોસાયટીના સેક્રેટરી બાબુ બૉસ આવ્યા.

‘શું કરો છો?’

‘કૉફી પીઉં છું,’ હજુ તો મેં પહેલો કે બીજો ઘૂંટ લીધો હશે, મેં કહ્યું, ‘તમે તો ચાના બંધાણી, કૉફી શાની ભાવે?’

‘એવું નથી,’ મારી સામે સોફામાં અડિંગો જમાવતાં બાબુભાઈએ કહ્યું, ‘જે સમયે જે મળે એનાથી ચલાવી લેવાનું…’

‘એ તો હું જોતો આવ્યો છું હોં,’ મેં ઘૂંટ ભરતાં કહ્યું, ‘બબિતાબહેનનો આટલો આકરો સ્વભાવ અને તેમ છતાં તમે જે રીતે...’

‘હું વાઇફની વાત નથી કરતો પંડ્યાજી,’ બાબુએ ચોખવટ કરતાં કહ્યું, ‘લાઇફની વાત કરું છું... માણસે લાઇફમાં ઍડ્જસ્ટમૅન્ટ કરતાં શીખવું જોઈએ.'

‘એ બધું એકનું એક જ કહેવાય,’ મેં એક ચૂસકી ભરતાં કહ્યું, ‘બોલો, અત્યારના પહોરમાં કેમ આવવું પડ્યું, છાપું આવ્યું નથી કે શું?’

‘છાપું તો ક્યારનુંય આવ્યું છે... વંચાઈ પણ ગયું, પણ... તમે વાંચ્યું હોય એમ લાગતું નથી.’

‘બસ, આ કૉફી પતે એટલે વાંચવાનું શરૂ કરવાનો જ છું,’ મેં કહ્યું, ‘બોલો, શું આવ્યું છે પેપરમાં?’

‘આવતીકાલે પંદરમી ઑગસ્ટ છે.’ બાબુએ છાપામાં આપેલી પ્રેસનોટ બતાવતાં મને કહ્યું, ‘આપણી સોસાયટીમાં ધ્વજવંદનનો કાર્યક્રમ રાખ્યો છે અને તમે હજુ ન્હાયાય નથી?’

‘ધ્વજવંદનનો કાર્યક્રમ આજે રાખ્યો છે?’ મને આશ્ચર્ય થયું, ‘પંદરમી ઑગસ્ટ તો આવતીકાલે છે!’

‘હા, પણ જે સ્થાનિક નેતાના હાથે આપણે ધ્વજવંદન કરાવવાનું છે એમનો એવો આગ્રહ હતો કે પંદરમી ઑગસ્ટના આગલા દિવસે કાર્યક્રમ રાખીએ તો એ પધારે...’

“નેતાને કહેવું’તું ને કે ધ્વજવંદન ભારતમાં કરવાનું છે, પાકિસ્તાનમાં નહીં, પાકિસ્તાનમાં ૧૪મી ઑગસ્ટે હોય...’’ મેં સહેજ અકળાઈને કહ્યું, ‘જ્યાં વેતા વગરના નેતા હોય એ સમાજને ભગવાન બચાવે. કેટલા વાગ્યે ધ્વજવંદન રાખ્યું છે?’

‘નવ વાગ્યે,’ બાબુએ ભીંત પરનું ઘડિયાળ જોઈને કહ્યું, ‘પોણા નવ તો થઈ ગયા..’