મોબાઇલ - ઇન્ટરનેટમાં પાંચમી પેઢીઃ શું થયું? શું થશે?

ફોર-જીના આગમન બાદ ટૅક્નોલૉજીના વિકાસ અને સામાન્ય પ્રજા, બિઝનેસના સંચાલન અને પ્રત્યાયન પર ઘણી મોટી અસર પડી. ઓનલાઇન શોપિંગ, વીડિયો ગેમિંગ, ડેટા ટ્રાન્સફરનું પ્રમાણ ખૂબ વધી ગયું

- વિનોદ પંડ્યા

આ મહિનાના અંત સુધીમાં ભારતની ત્રણ ટેલિકોમ ઓપરેટર (કેરિઅર) કંપનીઓ દેશમાં ફાઇવ-જી (ફિફ્થ જનરેશન) સેવાઓ લૉન્ચ કરશે. ફાઇવ-જી ટૅકનોલૉજીનો આરંભ સાથે ડેટા ટ્રાન્સફરની ઝડપ હાલમાં ફોર-જી સેવામાં મળે છે તેના કરતાં દસ ગણી વધી જશે. ટીવી પરની ડિબેટોમાં જોવા મળે છે કે સ્ટુડિયોમાંથી એન્કર કોઈ ઘરે બેઠેલા ચર્ચાશાસ્ત્રી સાથે વાતચીત કરતાં હોય છે ત્યારે એન્કરનો અવાજ શાસ્ત્રી સુધી થોડો મોડો પહોંચે છે અને શાસ્ત્રીનો જવાબ પરત આવે તેમાં વાર લાગે છે. અલગ-અલગ ટૅક માધ્યમોની પોતપોતાની સહેજ શિથિલતા હોય છે જેને લેટન્સી કહે છે. ફાઇવ-જીના આગમન બાદ આ લેટન્સી રહેશે નહીં.

કોઈ વીડિયો ગેમ રમવા માટે, બીજા શહેરમાં બેઠેલા સર્જન તબીબ રિયલ ટાઇમમાં કોઈ શસ્ત્રક્રિયાનું માર્ગદર્શન કરી શકે, ડ્રોન વગેરેની સચોટ ઉડાન માટે, માનવ ડ્રાઇવર રહિતની ઑટોમેટિક મોટરકારને દોડાવવા માટે લેટન્સી જેમ બને તેમ શૂન્ય અથવા શૂન્યની નજીક હોવી જોઈએ. ડેટા એક સ્થળેથી રવાના થાય અને બીજા સ્થળે પહોંચે ત્યાં સુધીમાં વચ્ચે વચ્ચે ઝડપમાં ઢીલ પડે તેવાં ત્રણથી ચાર બિંદુઓ અથવા ઠેકાણાં આવે. જેમ કે આપણા મોબાઇલમાંથી અવાજ રેડિયો તરંગમાં બદલાઈને નજીકના ટાવર સુધી પહોંચે તેને એક બિંદુ (અથવા સ્ટેશન) કહેવાય. હવે ફાઇવ-જીના આગમનથી આવા કોઈ બિંદુઓ ખાસ રુકાવટ પેદા કરી શકશે નહીં. તમે બટન દબાવશો અને પાંચસો મેગા બાઇટની ફીચર ફિલ્મ પલકવારમાં ટ્રાન્સફર થઈ જશે.