‘મીના કુમારી સાથે મારે ઇબાદતનો સંબંધ હતો'

તાજેતરમાં ૮૬ વર્ષની વયે વિદાય થયેલા દિગ્દર્શક – નિર્માતા સાવન કુમાર ટાકે ‘કહો ના પ્યાર હૈ'નાં કર્ણપ્રિય ગીતો લખ્યા હતા. તેમની ડિરેક્ટર તરીકેની પહેલી ફિલ્મ ‘ગોમતી કે કિનારે', મીના કુમારીની છેલ્લી ફિલ્મ હતી. ‘ટ્રેજેડી ક્વીન' સાથેના સાવન કુમાર ટાકના સંબંધો પણ ટ્રેજિક હતા! તેમને યાદ કરીએ

- પાર્થ દવે

૨૨ વર્ષ ને ૮ મહિના પહેલાં એક બાપે દીકરા માટે જોખમ લીધું હતું. ફિલ્મ બનાવીને રિલીઝ કરવાનું રિસ્ક! ડિસ્ટ્રિબ્યુટર્સે કહ્યું હતું કે રિલીઝ ડેટ આ ન રાખો, બદલી નાખો. કેમ કે તે ફિલ્મના અઠવાડિયા પહેલાં શાહરુખ ખાનની ‘ફિર ભી દિલ હૈ હિન્દુસ્તાની’ રિલીઝ થઈ હતી અને અઠવાડિયા પછી આમિર ખાનની ‘મેલા’ રિલીઝ થવાની હતી. અનિલ કપૂરની ભરપૂર પબ્લિસિટી બાદ આવેલી ‘પુકાર’ને પણ બે અઠવાડિયાં જ થયાં હતાં, પણ પિતા ન માન્યા. એટલું જ નહીં, તેમણે તો ફિલ્મને એ વિસ્તારમાં પણ રિલીઝ કરી, જ્યાં ડિસ્ટ્રિબ્યુટર્સે ચોખ્ખી ના પાડી હતી. કહે છે કે, તેના માટે નિર્માતા-દિગ્દર્શક પિતાએ પોતાનું ઘર ગિરવે મૂક્યું હતું.

તે પિતા એટલે રાકેશ રોશન અને તેમનો દીકરો એટલે ડેબ્યુટન્ટ એક્ટર રિતિક રોશન! તે ફિલ્મ ૨૦૦૦ની બિગેસ્ટ હિટ સાબિત થઈ. એટલું જ નહીં, દરમિયાનની ગંજાવર ‘મહોબ્બતેં', બાદમાં ડિઝાસ્ટર સાબિત થયેલી ‘મેલા’ અને ‘ધડકન' કરતાં પણ આગળ રહી. મૂળ તો રાજેશ ખન્નાની ‘આરાધના’ જોઈને રાકેશ રોશનને એક જ ચહેરાવાળા બે હીરોની વાર્તાનો આઇડિયા આવ્યો હતો. ‘ આરાધના’માં પિતાના મૃત્યુ બાદ સરખો ચહેરો ધરાવતો પુત્ર હોય છે. અહીં એક પ્રેમી (રોહિત)ના મૃત્યુ બાદ બીજો એક પ્રેમી (રાજ ચોપરા) આવે છે. રાકેશ રોશનની ફિલ્મોમાં સંગીત તેમના ભાઈ, રાજેશ રોશનનું રહેતું. ‘કહો ના પ્યાર હૈ’ ફિલ્મ ક્લિક કરી ગઈ તેમાં મોટો ફાળો તેના સંગીતનો પણ હતો. આજે પણ લકી અલીની કોન્સર્ટ્સમાં તે ગીતોનું વન્સ મોર થાય છે.

‘પ્યાર કી કશ્તી મેં, લહેરો કી મસ્તી મેં',

‘જાનેમન જાનેમન પલટ તેરી નજર' અને