અસાયલમ

ગુજરાતના એક ૨૬ વર્ષના યુવકને અમેરિકામાં કાયમ રહેવું હતું, પણ કોઈ પણ રીતે એને કાયદેસર ગ્રીનકાર્ડ મળી શકે એમ નહોતું. એને એવું સૂચવવામાં આવ્યું કે બી-૧ બી-૨ વિઝા મેળવીને એણે અમેરિકામાં પ્રવેશવું. ત્યાં છ મહિના રહેવા મળશે. ત્યાર બાદ અરજી કરીને એ બીજા છ મહિના ત્યાં રહી શકશે અને વર્ષ પૂરું થાય એ પહેલાં એણે અસાયલમની અરજી કરવી

- ડો.સુધીર શાહ

જાતિ, ધર્મ, રાષ્ટ્રીયતા, કોઈ એક ખાસ પ્રકારના સોશિયલ ગ્રૂપ યા સંસ્થાના સભ્ય અથવા રાજકારણને લગતા તમારા વિચારો, આમાંના કોઈ પણ કારણસર તમને પજવવામાં, હેરાન કરવામાં, દુઃખ દેવામાં કે તમારી ઉપર જુલ્મ કરવામાં આવતો હોય, તમને એવી બીક લાગતી હોય કે આ કારણોસર તમારી પજવણી થશે, તમને શારીરિક હાનિ પહોંચાડવામાં આવશે અને એ ભીતિને કારણે તમે તમારા દેશમાં પાછા જઈ ન શકો અથવા તો જવા ઇચ્છતા ન હોવ તો તમે ‘ફોર્મ આઈ૫૮૯’ ભરીને અમેરિકામાં અસાયલમ એટલે કે ‘રાજકીય આશરો' મેળવવાની માગણી કરી શકો છો. અસાયલમની અરજી તમે અમેરિકામાં પ્રવેશો એ સમયે અથવા તો ત્યાર બાદ એક વર્ષની અંદર કરવાની રહે છે.

અમેરિકાનું ઇમિગ્રેશન ખાતું એટલે કે યુનાઇટેડ સ્ટેટ સિટીઝનશિપ એન્ડ ઇમિગ્રેશન સર્વિસીસ ફોર્મ આઈ-૫૮૯ ‘ઍપ્લિકેશન ફોર અસાયલમ એન્ડ ફોર વિથ હોલ્ડિંગ ઓફ રિમૂવલ’ ફ્રીમાં આપે છે. રાજકીય આશરો માગનારાઓએ આ ફોર્મમાં જે વિગતો ભરવાની હોય એ ટાઇપ કરવાની અથવા તો કાળી શાહીથી હાથે બધા જ અક્ષરો કેપિટલમાં લખીને આપવાની રહે છે. અરજદારે સાથે સાથે એક દષ્ટાંતો આપતું સ્ટેટમેન્ટ પણ આપવું જોઈએ. કયા કારણસર જોરજુલમ થાય છે? શેની બીક લાગે છે? આ સર્વે દાખલાદલીલો આપીને જણાવવું જોઈએ. તેઓ જે દૃષ્ટાંતો વર્ણવે એ ઉડાઉ અને ઉપરછલ્લા ન હોવા જોઈએ. સમય, સ્થળ અને વ્યક્તિઓનાં નામો જણાવવા જોઈએ. જો બની શકે તો ફોટાઓ, છાપાંમાં પ્રગટ થયેલ સમાચારો, કોઈએ એ વિષય ઉપર લેખ લખ્યો હોય તો એ લેખ, આ સર્વે ફોર્મ આઈ-૫૮૯ જોડે આપવા જોઈએ.