હરખ હવે તું હિન્દુસ્તાન બ્રિટનમાં ઋષિનું રાજ

ભારતીય મૂળના ઋષિ સુનક બ્રિટનના નવા વડાપ્રધાન બન્યા

ભારત સહિત સમગ્ર દુનિયા જ્યારે દિવાળી પર્વની ઉજવણી કરી રહી હતી ત્યારે બ્રિટનથી એક મોટા અને તમામ ભારતીયોની છાતી ગર્વથી ફૂલાઈ જાય એવા શુભ સમાચાર સામે આવ્યા. દિવાળી એટલે કે ૨૪ ઑક્ટોબર, સોમવારની સવારે ભારતીય મૂળના ઋષિ સુનક બ્રિટનના નવા વડાપ્રધાન બન્યા. આવી દિવાળી ભેટની રાહ કરોડો ભારતીયો ઘણા લાંબા સમયથી જોઈ રહ્યા હતા.

બ્રિટનમાં ચાલી રહેલા રાજકીય સંકટના કારણે તત્કાલીન વડાંપ્રધાન લીઝ ટ્રસના રાજીનામા બાદ એ ચર્ચાએ બહુ જોર પકડ્યું હતું કે હવે બ્રિટનના નવા વડાપ્રધાનનો તાજ કોના શિરે મૂકાશે? એ વખતે એક અટકળ એવી પણ ચાલતી હતી કે પૂર્વ વડાપ્રધાન બોરિસ જોનસન ફરીથી સત્તાનું સુકાન સંભાળશે, પરંતુ તેમણે ખુદ જ પી.એમ. પદની રેસમાંથી હટી જવાની જાહેરાત કરતા આખરે ઋષિ સુનકનો માર્ગ સાવ મોકળો થઈ ગયો હતો.

માત્ર ૪૨ વર્ષીય ઋષિ સુનકને બ્રિટનના વડાપ્રધાન પદ સુધી પહોંચવા માટે ૨૦૦ સાંસદોનું સમર્થન મળ્યું હતું, જ્યારે તેમનાં હરીફ પૅની મોર્ડોન્ટ માત્ર ૨૬ સાંસદોનું જ સમર્થન મેળવી શક્યાં હતાં અને આથી તેમણે પોતાની દાવેદારી પરત ખેંચી લીધી હતી.