ગૂજરાત વિદ્યાપીઠની નાવ ખુદ વહીવટકર્તાઓએ જ ડૂબાડી

કુલનાયકે વહીવટી અનિયમિતતાઓ દુરસ્ત કરવાને બદલે ધ્યાન દોરનાર ખુદ નાયબ કુલસચિવ સામે શિક્ષાત્મક પગલાં લીધા ’ને તેમને બરતરફ કરવામાં આવ્યા ખુદ સરકાર વિધાપીઠના દ્વારે સામે ચાલીને આવી નથી, પણ વિધાપીઠમાં છેલ્લા દોઢ બે દાયકામાં ઘટેલી ઘટનાઓ ખુદ નાયબ કુલસચિવે ટ્રિબ્યુનલો, અદાલતો 'ને યુજીસી સુધી પહોંચાડી

- મણિલાલ એમ. પટેલ

ગૂજરાત વિદ્યાપીઠના કુલપતિપદે આચાર્ય દેવવ્રતની નિયુક્તિની સામે વાંધા-વિરોધના ઝંડા બુલંદ કરનારાઓએ આત્મખોજ કરવાની જરૂર છે. માત્ર ખાદી ધારણ કરવી તેને જ ગાંધીવાદની એકમેવ ઓળખના માપદંડ સ્થાપિત કરનારાઓ એ ભૂલી જાય છે કે તેઓએ ગાંધીજીના અન્ય આદર્શો, મહાવ્રત અને સ્વચ્છતા તેમ જ રચનાત્મક પ્રવૃત્તિના તમામ વાઘાઓ ક્યારના ઉતારીને ફેંકી દીધા છે. ગાંધીવાદી કહેતાં ગાંધીયન સંસ્થાઓનો વહીવટ સંભાળનારાઓ તેમના સંસ્થાનની બહાર કોઈ ગાંધીવાદી હોઈ જ ન શકે એવું માનીને ચાલે છે. હકીકત એ છે કે સાચા ગાંધીવાદીઓ ભલે સાવ નજીવી સંખ્યા હોય તો પણ તે આવા સંસ્થાનની બહાર જોવા મળે છે અને તેમાંના એક આચાર્ય દેવવ્રત છે. નખશિખ પ્રામાણિક, સાદું શિસ્તબદ્ધ જીવન. પોતે સ્વીકારેલા આદર્શો પ્રત્યે સંનિષ્ઠ અને સમર્પિત. તેમણે આર્ય સમાજના સિદ્ધાંતો સ્વીકારી તેને અનુરૂપ પોતાના જીવનને ઢાળ્યું છે. જીવનમાં નૈતિકતાના આચરણની બાબતમાં તેઓ અન્ય કોઈ પણ કહેવાતા ગાંધીવાદી કરતાં સવાયા પુરવાર થાય તેમ છે. ગૂજરાત વિદ્યાપીઠના કુલપતિપદે નિયુક્તિના વિવાદ દરમિયાન તેમણે એક અંગ્રેજી અખબારને આપેલી મુલાકાતમાં કહ્યું છે કે, ગાંધીજી જો જીવિત હોત તો વિદ્યાપીઠના કુલપતિપદ માટે તેમણે મને આશીર્વાદ આપ્યા હોત. ગાંધીજી પ્રણિત સિદ્ધાંતોમાં અનન્ય આસ્થા હોય ત્યારે જ વ્યક્તિ આવું વિધાન કરી શકે. વિરોધના ઝંડા ઉઠાવનારાઓને વાંધો એ પણ રહ્યો કે આરએસએસના વ્યક્તિને ગાંધીવાદી સંસ્થામાં ઉચ્ચ પદ અપાયું છે. તેઓ ભૂલી જાય છે કે સ્વયં ગાંધીજીને આરએસએસ સામે કોઈ વાંધો ન હતો. તેઓ એકથી વધુ વખત સંઘ-શાખા, શિબિરમાં આવેલા. સંઘમાં અસંખ્ય પદાધિકારીઓ આજીવન ખાદીવ્રતધારી રહ્યા છે. ગાંધીજીના પટ્ટશિષ્ય સમાન અપ્પાજી જોશી સંઘ સ્થાપક ડૉ. હેડગેવારના નિકટના સહયોગી અને સંઘના અધિકારી હતા. ગાંધીવાદીઓના દંભની પરાકાષ્ઠા તો એ છે કે નક્સલવાદી હિંસાને વાજબી ઠરાવનારા મહાશ્વેતા દેવીને વિદ્યાપીઠના અતિથિગૃહમાં ઉતારો આપી મહેમાન બનાવાયા હતા. સંઘે આવી હિંસાનું ક્યારેય પ્રબોધન કર્યું નથી. ગૂજરાત વિદ્યાપીઠના આંતરિક રાજકારણની અસલિયત અહીં પ્રસ્તુત છે.