એક ગુજરાતી ફિલ્મ જ્યારે પહોંચે છે ઓસ્કર..

ઑસ્કર માટે ભારત તરફથી ગુજરાતી ફિલ્મ ‘છેલ્લો શૉ’નું નોમિનેશન થતાં ગુજરાતી ફિલ્મ ઇન્ડસ્ટ્રી ફરી એકવાર ચર્ચામાં છે. બદલાતાં સમય અને પરિવર્તનો સાથે આગળ વધી રહેલા ગુજરાતી ફિલ્મોદ્યોગ માટે આ ખૂબ મોટા અને મહત્ત્વના સમાચાર છે. ફિલ્મના ડિરેક્ટર પાન નલિન અને ફિલ્મના બાળકળાકારો પણ ખૂબ ચર્ચામાં છે.

- આર્જવ પારેખ

જ્યારે પણ ઓસ્કરમાં ફિલ્મો મોકલવાની આવે, ઓસ્કર એવોર્ડનો સમય નજીક આવે ત્યારે માત્ર ચર્ચાઓથી જ આપણે સંતોષ માનવો પડે છે. આવી પરિસ્થિતિમાં જ્યારે એક ગુજરાતી ફિલ્મ ‘છેલ્લો શો’ જ્યારે ઓસ્કર માટે ભારત તરફથી મોકલવામાં આવે એ ખરેખર ગર્વની ક્ષણ છે. આ ફિલ્મની પસંદગી એવા સમયે થઈ છે જ્યારે એક પછી એક ધડાધડ કમાણી કરતી ફિલ્મો સાઉથમાંથી આવી રહી છે અને ભરપૂર પ્રતિસ્પર્ધાવાળો માહોલ છે છતાં ઓસ્કર માટે ગુજરાતી ફિલ્મ પસંદગી પામી છે.

છેલ્લો શો ફિલ્મ એ આમ જોવા જઈએ તો ફિલ્મના ડિરેક્ટર પાન નલિનની જ અર્ધ આત્મકથાનક સમાન ફિલ્મ છે. મૂળ નામ નલિન રમણિકલાલ પંડ્યા જે આગળ જતાં ‘પાન નલિન' થયું. સૌરાષ્ટ્રના અમરેલીના અડતાળા ગામમાં તેમનો જન્મ. પિતા ચાની લારી ચલાવતા હતા અને નલિન શાળાએ પણ જાય અને પિતાને મદદ પણ કરે. પરિવારની સ્થિતિ ખૂબ સામાન્ય હતી. નલિન એ એવી જ ટેલેન્ટનો ભાગ હતા જે ગામડામાં સામાન્ય ઘરના છોકરાઓમાં ભરપૂર માત્રામાં હોય છે, પણ જે મોટા ભાગે પીઠબળ કે સાચી દિશાના અભાવમાં વેડફાઈ જતી હોય છે, પરંતુ એ નલિનનો પોતાના સ્વપ્નો પ્રત્યેનો પ્રેમ હતો, એ અદમ્ય ઇચ્છાશક્તિ હતી કે જેણે આ બધી તકલીફોની વચ્ચેથી પોતાનો મારગ કંડાર્યો.