આયુર્વેદિક જડીબુટ્ટીઓથી ભરપૂર સ્વાસ્થ્યવર્ધક વસાણાં

આમ તો હજુ શિયાળાની ઠંડીએ ટકોરા માર્યા નથી, પરંતુ માર્કેટમાં વસાણાંનું વેચાણ શરૂ થઈ ગયું છે. સામાન્ય રીતે દિવાળી પૂર્ણ થતાં જ બજારમાં સ્વાસ્થ્યવર્ધક જુદા-જુદા પાકનું વેચાણ થવા લાગે છે. તો ઘણી જગ્યાએ આજે પણ વસાણાં ઘરે જ બનાવવામાં આવે છે.

- ગરિમા બ્રહ્મભટ્ટ

‘મને આજે પણ યાદ છે, શિયાળો શરૂ થતા જ દાદીમા, કાકીમા અને મમ્મી જુદાં-જુદાં વસાણાં બનાવતાં. રોજ સવારે વાટકીમાં કોપરા 'ને ગોળની સાથે અલગ-અલગ પાકના પણ ટુકડા ખાવા મળતા. તેમાં સૂંઠથી બનેલા લાડુ તો મને સહેજ પણ ભાવતા નહીં છતાં દાદીમા માથે ઊભાં રહીને ખવડાવતાં. આજે વર્ષો પછી ખબર પડે છે કે ખરેખર વસાણાંનું આપણા જીવનમાં કેટલું મહત્ત્વ રહેલું છે.’ તંદુરસ્તીની દષ્ટિએ શિયાળો સ્વાસ્થ્ય માટે સૌથી સારી ઋતુ માનવામાં આવે છે. સ્વાસ્થ સારું બનાવવા જુદા-જુદા ઉપાયો પણ લોકો કરતા હોય છે. જેમાં વસાણાં ઉત્તમ ગણવામાં આવે છે. શિયાળામાં ખાસ ખાવામાં આવતી જુદી-જુદી વાનગીઓ એટલે શિયાળુ પાક. જેમાં મેથીપાક, સાલમપાક, અડદિયાપાક, ખજૂરપાક, ગુંદરપાક, અખરોટપાક, આદુપાક, અંજીરપાક, ગોળના લાડુ, મિક્સ ડ્રાયફ્રૂટ પાક, સૂંઠપાક, સિંગપાક, કાળા અને સફેદ તલના લાડુ વગેરે જેવા અનેક પાકનો સમાવેશ થાય છે. આ દરેકમાં આયુર્વેદિક જડીબુટ્ટીઓ નાખવામાં આવતી હોવાથી શરીર માટે સારી ગણવામાં આવે છે.