‘આપ’નું એપિસેન્ટર ગણાતા સુરતમાં મતદારો કોના માથે કળશ ઢોળશે?

કોર્પોરેશનમાં ભૂકંપ પેદા કરનાર પાર્ટી વિધાનસભામાં પણ એવો જ દેખાવ દર્શાવી શકશે? સુરતમાં આ વખતની ચૂંટણીઓમાં કયા પ્રકારના ‘આફ્ટરશોક્સ’ જોવા મળશે?!

- જ્વલંત નાયક

૨૩ ફેબ્રુઆરી, ૨૦૨૧. સુરતના રાજકારણમાં આ તારીખ યાદગાર છે. એ દિવસે સવારથી મહાનગરપાલિકાનાં પરિણામો જાહેર થવાની શરૂઆત થઈ ગઈ. અપેક્ષા મુજબ, સુરત મ્યુનિસિપલ કોર્પોરેશનનો પોતાનો ગઢ આ વખતે પણ ભાજપ અંકે કરશે એ સ્પષ્ટ થઈ ગયું, પણ સાથે જ બીજી એક ઘટના બની, ‘આમ આદમી પાર્ટી’નો ઉદય!

૧૨૦ પૈકીની ૯૩ બેઠક ભાજપે જીતી લીધી, પણ ચર્ચા તો આમ આદમી પાર્ટીએ જીતેલી ૨૭ બેઠકો વિષે જ વધુ થઈ! કોર્પોરેશન હોય, વિધાનસભા હોય કે પછી લોકસભા હોય, સુરત દાયકાઓથી ભાજપનો મજબૂત ગઢ બની રહ્યું છે. અહીંના મતદારો ઉમેદવાર કરતાં વધુ મહત્ત્વ ‘કમળ’ના ફૂલને આપતા રહ્યા છે. ભાજપને નામે ચૂંટાયેલા ભલભલા લોકપ્રિય નેતાઓય જ્યારે ભાજપ છોડીને સામે પક્ષે બેઠા ત્યારે સુરતની પ્રજાએ એમને જાકારો આપ્યો હોવાના એકથી વધુ બનાવ આ શહેરના રાજકીય ઇતિહાસમાં નોંધાયેલા છે. હવે આવા મજબૂત ગઢમાં કોઈ નવીસવી પાર્ટી આવીને મસમોટું બાકોરું પાડી જાય તો એની ચર્ચા તો થવાની જ! અને આ ચર્ચાઓ લંબાઈને વિધાનસભા અને એથીય વધુ લંબાઈને લોકસભા (અહીં નરેન્દ્ર મોદી વાંચવું) સુધી ન પહોંચે તો જ નવાઈ! સુરતની તાસીર જ એવી છે.