રાજસ્થાનમાં કોંગ્રેસ મોવડીમંડળની વિકટ સ્થિતિ

રાજસ્થાનમાં રાહુલની યાત્રા પ્રવેશ કરે અને સમગ્ર યાત્રાનો કાર્યક્રમ હેમખેમ પાર પડે, એ માટે થઈને કોંગ્રેસ અત્યારે ગેહલોતને કશું કહેવાના મૂડમાં નથી

રાજસ્થાનમાં ગ્રાન્ડ ઓલ્ડ પાર્ટી કોંગ્રેસ માટે બહુ વિચિત્ર અને કફોડી સ્થિતિ સર્જાઈ છે. એક તરફ રાહુલ ગાંધીની ભારત જોડો યાત્રા રાજસ્થાનમાં પ્રવેશ કરવાની તૈયારીમાં છે, ત્યારે બીજી તરફ રાજસ્થાનમાં કોંગ્રેસની આંતરિક જૂથબંધીની લડાઈ પરાકાષ્ઠાએ પહોંચી છે.

રાજસ્થાનના મુખ્યપ્રધાન અશોક ગેહલોતે બરાબર આ જ સમયે એક ટીવી ચેનલને મુલાકાત આપીને પોતાના પ્રતિસ્પર્ધી પ્રદેશ કોંગ્રેસના નેતા સચિન પાયલોટ સામે ગંભીર પ્રકારના આક્ષેપોનો મારો ચલાવ્યો છે. તેમણે સચિન પાયલોટને ‘ગદાર’ પણ કહ્યા છે અને તેઓ કોઈ રીતે રાજ્યના મુખ્યપ્રધાન બનવાને લાયક નથી, એવું કહી દીધું છે.