જાતને મુશ્કેલીમાં ન મૂકતા

અનેક નાટ્ય સંસ્થાઓ અમેરિકામાં નાટકો ભજવવા જાય છે. તેઓ જરૂરી એવા પી-૩ વિઝા મેળવીને અમેરિકામાં નાટકો ભજવે છે, પણ કોઈકવાર એમનો એકાદ કલાકાર જેની પાસે પી-૩ વિઝા હોય પણ એ અનિવાર્ય સંજોગોના કારણે નાટક ભજવવા અમેરિકા જઈ શકે એમ ન હોય ત્યારે નાટકના પ્રોડ્યુસરો તેમ જ અમેરિકાના પ્રસ્તુતકર્તાઓ બીજો કોઈ કલાકાર જેની પાસે બી-૧/બી-૨ વિઝા હોય એમને એ વિઝા ઉપર અમેરિકામાં આવવાનું જણાવે છે અને પછી પેલો હાજર રહી ન શકેલ પી-૩ વિઝાધારક કલાકારની જગ્યાએ એ બી-૧/બી-૨ વિઝાધારક કલાકારને પરફોર્મ કરવાનું, નાટક ભજવવાનું જણાવે છે

- ડો.સુધીર શાહ

ગુજરાતના એક વક્તા છે. જેઓ વર્ષમાં બે-ત્રણ વાર અમેરિકા જાય છે. ત્યાં બેથી ચાર અઠવાડિયાં રહે છે. જુદાં જુદાં શહેરોમાં સામાજિક તેમ જ ધાર્મિક વિષયો ઉપર વ્યાખ્યાનો આપે છે. એ માટે તેઓ અમેરિકન આમંત્રણકારો પાસેથી સારી એવી ફી લે છે. અમેરિકા આવવા-જવાની પ્લેનની બિઝનેસ ક્લાસની ટિકિટનો ખર્ચો તેમ જ રહેવા, ખાવાનો અને એક સ્થળેથી બીજે સ્થળે જવાનો ખર્ચો પણ મેળવે છે. શ્રોતાઓ જે ભેટસોગાદો આપે - કેશ યા કાઇન્ડમાં, એ પણ સ્વીકારે છે. વ્યાખ્યાનો આપવા માટે એમને જે ફી મળે છે, એમના આમંત્રણકારો એમને અમેરિકામાં બોલાવવા માટે અને રહેવા-ખાવા માટે જે ખર્ચો કરે છે આ સઘળું તેઓ ન તો અમેરિકાના ઇન્કમટેક્સ ખાતાને જણાવે છે કે ન તો ભારતમાં આઈટી રિટર્ન ફાઇલ કરે છે એમાં દેખાડે છે.

નાના-મોટા પાયે અનેક આવું વ્યાખ્યાનકારો, ગાયકો, નૃત્યકારો અને અન્યો કરે છે. બી-૧/બી-૨ એટલે કે બિઝનેસ યા વિઝિટર્સ વિઝા ઉપર અમેરિકામાં પ્રવેશીને તેઓ ત્યાં આ મુજબનો રીતસરનો એમના વ્યવસાયનો ધંધો કરે છે.

બી-૧/બી-૨ વિઝા ઉપર આવું વર્તન કરવું એ ઇલીગલ છે. ઉપરાંત અમેરિકામાં કમાણી થાય એના ઉપર અમેરિકામાં કે ભારતમાં કશે પણ ટેક્સ ન ભરવો, એ આવક છુપાવવી, એ પણ અમેરિકાનો તેમ જ ભારતનો ગુનો છે. એમને આ વાતની બરાબરની ખબર હોય છે. તેમ છતાં તેઓ આવું ખોટું આચરણ આચરે છે. મોટી-મોટી સભાઓમાં મોટા-મોટા સિદ્ધાંતોની તેઓ વાતો કરે છે, પણ એમના પોતાના જીવનમાં જ કોઈ સિદ્ધાંતો હોતા નથી. તેઓ કાયદાઓનું છડેચોક ઉલ્લંઘન કરતા હોય છે.