વિધાર્થીઓને ચેતવણી

એક પરદેશી વિદ્યાર્થી જે અમેરિકામાં ભણવા જાય છે એમને ફક્ત અને ફક્ત અઠવાડિયાના વીસ કલાક જ ઓનકેમ્પસ એટલે કે તેઓ જે યુનિવર્સિટીમાં ભણતા હોય એ જ યુનિવર્સિટીની અંદર કામ કરવાની છૂટ હોય છે

- ડો.સુધીર શાહ

નરેન્દ્રના પિતા કરોડોપતિ હતા. નરેન્દ્ર પણ ભણવામાં હોશિયાર હતો. શાળાનું ભણતર પૂરું કરીને નરેન્દ્રને એના પિતાએ અમેરિકાની યુનિવર્સિટીમાં ભણવા મોકલ્યો. યુનિવર્સિટીમાં પ્રવેશ મેળવવા જે અરજીપત્રક નરેન્દ્રએ ભર્યું હતું અને પ્રવેશ મળ્યા બાદ સ્ટુડન્ટ વિઝા મેળવવા માટે પણ જે અરજીપત્રક ભર્યું હતું એ બંનેમાં નરેન્દ્રએ જણાવ્યું હતું કે અમેરિકાની યુનિવર્સિટીની ટ્યૂશન ફી તેમ જ અમેરિકામાં રહેવા ખાવાનો અને પરચૂરણ ખર્ચો એના કરોડપતિ પિતા આપશે.

દીકરાને ઑફિશિયલી બેન્ક ટ્રાન્સફર દ્વારા અમેરિકામાં ભણવા માટે પૈસા મોકલાવે તો તો વ્હાઇટના ટેક્સ ભરેલા પૈસા ખર્ચવા પડે. નરેન્દ્રના પિતાએ ગોઠવણ કરી. અમેરિકામાં રહેતા એના મિત્રને જણાવ્યું કે તું મારા દીકરાને આટલા ડૉલર આપી દેજે. તું જ્યારે ઇન્ડિયા આવે ત્યારે એક્સચેન્જ રેટ પ્રમાણે એટલા ડૉલરના રૂપિયા અહીં રોકડામાં આપી દઈશ. પિતાના એ મિત્રએ નરેન્દ્રને અમેરિકામાં ભણવા અને રહેવા માટે ડૉલર આપ્યા. નરેન્દ્રએ એ બધા પોતાના બેન્ક એકાઉન્ટમાં જમા કર્યા અને એમાંથી યુનિવર્સિટીની ટ્યૂશન ફી, એ જ્યાં રહેતો હતો એ જગ્યાનું ભાડું અને અન્ય ખર્ચાઓ કર્યા.