ફાસ્ટ ફૂડના સમયમાં દેશી પરંપરાગત વાનગીઓ વિસરાતી જાય છે

આજના ફાસ્ટ ફૂડના સમયમાં પરંપરાગત દેશી અને પૌષ્ટિક વાનગીઓ વિસરાતી જાય છે. એવી અનેક વાનગીઓ છે જેનો સ્વાદ તો શું નામ પણ આજની નવી પેઢીઓ જાણતી નહીં હોય. ત્યારે આજે એવી જ વિસરાતી જતી વાનગીઓની વાત કરવી છે.

પિઝા-બર્ગર જેવા ફાસ્ટ ફૂડના સમયમાં દેશી પરંપરાગત વાનગીઓ ભુલાતી જાય છે. એવી તો અનેક રસોઈ છે જેનો સ્વાદ આજની યુવા પેઢીએ ચાખ્યો નહીં હોય, એટલું જ નહીં, એનાં નામ પણ એમના માટે નવાં હશે. બાજરી, તુવેરની ખીચડી, ભૈડકું, જુવારની પાનકી, અળવીની દાંડીના મૂઠિયાં, કોદરીનાં ઢોકળાં, તુરિયાની છાલની ચટણી જેવી અનેક વાનગીઓ એવી છે જેના નામ આજે ભલે નવા લાગે, પરંતુ હકીકતમાં તો આ વિસરાતી જતી વાનગીના લિસ્ટમાં સૌથી મોખરે છે.

બાજરીના રોટલા તો હજુ પણ રેસ્ટોરન્ટ અને હાઈવે પરના ઢાબા પર મળી રહે છે, પરંતુ શિયાળામાં ખાસ પીવાતી બાજરીની ખીર હવે વિસરાઈ ગઈ છે. પહેલાંના સમયમાં શિયાળામાં વહેલી સવારે ગરમાગરમ બાજરીની ખીર પીવામાં આવતી. આરોગ્યની દૃષ્ટિએ પણ આ ખીર ઉત્તમ ગણાય છે. કહેવાય છે કે બાજરીની ખીર વહેલી સવારે પીવાથી આખો દિવસ શરીરમાં ગરમી રહે છે અને ઠંડી સામે રક્ષણ આપે છે.