શિવભક્ત કનપ્પાની રસપ્રદ કથા

કન્નપ્પાના જેવા પ્રેમ, સમર્પણ અને નિષ્કપટ ભાવથી મનુષ્ય ઈશ્વરની સમીપે આવે ત્યારે કોઈ પણ મૂર્ત-અમૂર્ત, સુંદર-બેડોળ વસ્તુઓ ઈશ્વર સાથે જોડાવાનો સેતુ બાંધી આપે

- સ્પર્શ હાર્દિક

પ્રત્યેક માસની અમાસ પહેલાંની રાત્રિ શિવરાત્રિ કહેવાઈ છે, પણ ગુજરાતી સંવત પ્રમાણે મહા વદ પક્ષની ચૌદમી રાત્રિ મહાશિવરાત્રિ ગણાય. મત્સ્યપુરાણમાં શિવજી પાર્વતીજીને જણાવે છે કે, મહાશિવરાત્રિના દિવસે પદ્ધતિસર વ્રત કરનાર અવશ્ય એમને પ્રસન્ન કરે છે. એટલું જ નહીં, પણ ફક્ત નરી શ્રદ્ધાથી શિવજીને બિલ્વપત્ર ચડાવવાથી પણ શિવજી ખુશ થાય. શિવજી આશુતોષ ઝડપથી પ્રસન્ન થનારા છે એવું આપણે જાણ્યું છે. અલબત્ત, ડિવોશન એટલે કે ભક્તિ કોઈ પણ સ્વરૂપે રહેલા ઈશ્વર પ્રત્યે પ્રેમ પ્રગટ કરવાનો શ્રેષ્ઠ તરીકો છે. આ વિષયના આભમાં વિહાર કરતા ભક્તિના શિખર પર બિરાજતાં મીરાં, નરસિંહ, રામકૃષ્ણ પરમહંસ જેવાં નામો તરત સ્મૃતિમાં ઝબકી આવે. અહીં વાત કરીએ આપણા માટે જરા અજાણ્યા શિવભક્ત કન્નપ્પા કે કણપ્પાની.