ચેટ જીપીટી vs ગૂગલ બાર્ડ: આર્ટિફિશિયલ ઇન્ટેલિજન્સ તરફ વિશ્વએ દોટ મૂકી

છેલ્લા બે મહિનાથી દુનિયાભરમાં આર્ટિફિશિયલ ઇન્ટેલિજન્સ પર આધારિત ચેટબોટ – ચેટ જીપીટીએ ધમાલ મચાવી છે. તેના આગમનથી સૌથી વધુ અસર ગૂગલ પર થશે એવું લોકો માની રહ્યા છે, પરંતુ આ વૈશ્વિક પ્રતિસ્પર્ધામાં ગૂગલ પણ જરાય પાછીપાની કરવા માંગતું નથી અને તેણે બાર્ડ નામનું આવું જ એક નવું બોટ રજૂ કર્યું છે. ગૂગલનો દાવો છે કે ચેટ જીપીટી કરતાં પણ એ વધુ બુદ્ધિમાન બોટ છે.

- આર્જવ પારેખ

નવેમ્બર ૨૦૨૨માં જ ઓપન-AI દ્વારા લૉન્ચ કરવામાં આવેલા ચેટ-જીપીટી (ચેટ જનરેટિવ પ્રિટેન્ડ ટ્રાન્સફોર્મર)એ માત્ર ટૅક્નોલૉજીની દુનિયામાં જ ધમાલ મચાવી છે એવું નથી, પણ તેનું નામ માત્ર બે મહિના જેટલા સમયગાળામાં જ ઘરે-ઘરે જાણીતું થવા લાગ્યું છે. બહુ ટૂંકા ગાળામાં જ ચેટ-જીપીટી ૧૦ કરોડ વપરાશકર્તાઓના આંકને વટાવી ચૂક્યું છે. ચેટ-જીપીટી હાલમાં તો અંગ્રેજી ભાષામાં જ લૉન્ચ કરવામાં આવ્યું છે, પરંતુ ભવિષ્યમાં તે અન્ય ભાષાઓમાં પણ ઉપલબ્ધ થશે તેવું લક્ષ્ય રાખવામાં આવ્યું છે.

ચેટ-જીપીટીને આપણે સર્ચ એન્જિન સાથે સરખાવી શકીએ, પરંતુ તે હકીકતમાં સર્ચ એન્જિન નથી. તે સર્ચ એન્જિન ગૂગલથી અનેક રીતે અલગ પડે છે. ગૂગલ પર આપણે ધારો કે એવું સર્ચ કરીએ કે, ‘વર્ષાઋતુ પર નિબંધ લખો’ તો આપણને સીધો જ કોઈ નિબંધ તૈયાર મળી જાય એવું નથી થતું. આ નિબંધ અથવા તો વર્ષાઋતુ વિશે જે વેબસાઇટ પર લખાયેલું હોય તેની એક સામટી લિંક આપણને જોવા મળે છે, જ્યારે ચેટ-જીપીટી પર તો તમે આ પ્રશ્ન પૂછો એટલે સીધો જ તમને નિબંધ લખાયેલો મળે છે. વળી, તમે તેને કહો કે તમે આ નિબંધથી સંતુષ્ટ નથી તો એ ફેરફાર સાથે ફરીથી બીજો નિબંધ રજૂ કરે છે. તમે એમ કહો કે હજુ લાંબો નિબંધ જોઈએ છે તો એ વધુ લાંબો નિબંધ લખીને આપે છે. તમારે કોઈ નાનકડી સ્ક્રિપ્ટ લખવી છે કે પછી શાળામાં રજા લેવા માટે અરજી લખવી છે તો એ તમામ વસ્તુઓ થોડી જ સેકંડોમાં તમને મળી રહે છે.

આ પ્રશ્નના જવાબથી ગૂગલે એક દિવસમાં ૧૦૦ અબજ ડોલર ગુમાવ્યા

ચેટ-જીપીટીના ડેવલોપર્સ દ્વારા જે માહિતી સાર્વજનિક રીતે ઉપલબ્ધ હોય તેનો જ ઉપયોગ કરવામાં આવ્યો છે. એટલે કે વિશ્વની તમામ વેબસાઇટ કે સોશિયલ મીડિયા પ્લૅટફૉર્મ્સ પર જે કન્ટેન્ટ ઉપલબ્ધ હશે તેના પરથી જ ચેટજીપીટી પોતાનો જવાબ રજૂ કરશે. વધુમાં તેમાં ૨૦૨૧ સુધીનો ડેટા જ લૉડ કરવામાં આવ્યો છે એટલે કે તમે તેને તાજેતરની કોઈ ઘટના વિશે પૃચ્છા કરશો તો એ જવાબ નહીં આપી શકે. હાલના સંજોગોમાં ચેટ-જીપીટીની સૌથી મોટી મર્યાદા એ છે કે તે પ્રાદેશિક ભાષાઓમાં હજુ લૉન્ચ થયું નથી અને ખૂબ નજીકના ભવિષ્યમાં જ તેનો ઉપયોગ કરવા માટે આપણે પૈસાની ચુકવણી પણ કરવી પડશે તે નિશ્ચિત મનાય છે. હાલમાં જ વધુ પડતાં સવાલોનો મારો થતાં તથા વપરાશકર્તાઓ વધતા, ચેટ-જીપીટી સંપૂર્ણપણે ઠપ પણ થઈ જાય છે અને સવાલોના જવાબ આપવામાં વધુ સમય પણ લે છે.