યુક્રેન યુદ્ધ: ત્રણ લાખથી વધુ હોમાયા, યુદ્ધ ચાલુ છે, અંત દૂર છે

ટોચના અમુક અધિકારીઓ સિવાયના અમેરિકન કે અન્ય કોઈ દેશના નેતાઓ, નાગરિકો જાણતા ન હતા કે બાઇડેન યુક્રેન જવા રવાના થઈ ગયા છે ચીન તરફથી રશિયાને ચીની શસ્ત્રો પૂરાં પાડવાની યોજના ઘડાઈ રહી હતી. એ બંને દેશો એક થઈ જાય તો તેઓની સામે લડવાનું પશ્ચિમના દેશોને ભારે પડી જાય. વિશ્વયુદ્ધ પણ ફાટી નીકળે

- વિનોદ પંડ્યા

યુક્રેન પરના રશિયન યુદ્ધને ગઈ ૨૪ ફેબ્રુઆરીએ એક વરસ પૂરું થવામાં હતું ત્યારે હવામાં એક પ્રકારનો ડર હતો કે રશિયાના વ્લાદિમીર પુતિન વરસી નિમિત્તે મિસાઇલોનો મારો ચલાવી, જે કંઈ થોડું ઘણું બચ્યું છે એ યુક્રેનને પણ ખેદાનમેદાન કરી નાખશે, પરંતુ યુક્રેનમાં હવે એવી સ્થિતિ છે જેમાં વીજળી પડવાનો ડર રહ્યો નથી. યુક્રેનની પ્રજાએ આખું વરસ અપ્રતિમ બહાદુરી, સ્વસ્થતા સાથેની સફળતા અને રાષ્ટ્રપ્રેમની ચરમસીમાનું પ્રદર્શન કર્યું છે. હવે કદાચ યુક્રેન હારી જાય તો પણ એનું પ્રતિરક્ષણ અને એના પ્રમુખ વ્લોદોમિર ઝેલેન્સ્કી ઇતિહાસમાં અમર બની જશે. ઝેલેન્સ્કીને પશ્ચિમના નાટો રાષ્ટ્રોનો ટેકો છે, પરંતુ જોઈએ એટલી માત્રામાં પૂરો પાડ્યો નથી. ઝેલેન્સ્કી ખૂબ આજીજી કરે ત્યારે અમેરિકા અને તેની સરદારી હેઠળના દેશો અધૂરા મને, અધૂરાં શસ્ત્રો મોડે મોડે પહોંચાડે. યુક્રેનને મદદ આપવા બાબતે નાટો દેશોનાં પોતપોતાનાં અલગ-અલગ મંતવ્યો હતાં. અલગ-અલગ પ્રકારની વ્યૂહાત્મક અને ટૅક્નોલૉજિક મજબૂરીઓ પણ છે. ઘણા લાંબા સમયથી એક-બે ડઝન ટેન્કો પૂરી પાડવાની હતી તે માત્ર નિવેદનો દ્વારા જ પૂરી પડાતી રહી. હજી સુધી કોઈ ટેન્ક યુક્રેનની ભૂમિ સુધી પહોંચી નથી. નાટો દેશો પાસેનાં વિમાનો બાબતે પણ એવી જ સ્થિતિ છે. જો યુક્રેન સિવાયનો કોઈ બીજો દેશ હોત તો ધીમી ધારની મદદ પહોંચે તે પહેલાં જ હારી ગયો હોત.