અતિકનો સાબરમતી જેલવાસ અધિકારીઓ માટે લોટરી હતી

અમદાવાદની સાબરમતી સેન્ટ્રલ જેલને ગુનેગારોની નગરી કહેવામાં આવે છે. કહેવાય છે કે કોઈ પણ આરોપી જેલમાં જાય એટલે તે સુધરી જાય છે, પરંતુ આ વાત તદ્દન ખોટી છે, કારણ કે જેલમાં આરોપીઓ સુધરવાની જગ્યાએ વધુ ને વધુ ખૂંખાર બનીને બહાર આવે છે.

- મૌલિક પટેલ

યુપીના બાહુબલી માફિયા અતીક અતિક અહમદના મોતનું કાઉનડાઉન તો ત્યારે જ ચાલુ થઈ ગયું હતું કે જ્યારે તેણે ત્રીજી જૂન, ૨૦૧૯ રોજ સાબરમતી સેન્ટ્રલ જેલમાં પહેલી વખત એન્ટ્રી મારી હતી. ગેંગસ્ટર અતિક અહમદને એમ હતું કે ઉત્તર પ્રદેશથી ૧૩૦૦ કિલોમીટર દૂર સાબરમતી સેન્ટ્રલ જેલમાં તે રૂપિયાના જોરે પોતાની હુકૂમત ચલાવી શકશે. અતિકના ઇરાદા સ્પષ્ટ હતા એટલે તે સફળ થયો, પરંતુ તેને સપનામાં ખ્યાલ ન હતો કે જેલની બહાર નીકળતાની સાથે જ તેને દસ ફૂટની કબર મળવાની હતી. સાબરમતી સેન્ટ્રલ જેલના હાઈસિક્યૉરિટી ઝોનમાં બેઠા-બેઠા અતિકે કરેલી લીલાનો ખેલ ચાર વર્ષમાં જ પૂરો થતાં હવે ઇતિહાસ બની ગયો છે. અતિકના જેલથી કબર સુધી પહોંચવામાં જો સૌથી વધુ મહત્ત્વનો ફાળો હોય તો તે સાબરમતી જેલનો છે. જો અતિકને જેલમાં સુખસુવિધા મળી ના હોત તો કદાચ આજે યુપીના એસ્ટેટ બ્રોકર જીશાને પાંચ કરોડની ખંડણી માગવાની ફરિયાદ ના કરી હોત અને ઉમેશ પાલ જીવતો રહ્યો હોત. યુપીમાં હાલ જે ઘમાસાણ મચ્યું છે તેની પાછળ સાબરમતી સેન્ટ્રલ જેલ પ્રત્યક્ષ અને પરોક્ષ રીતે જવાબદાર છે.

અમદાવાદની સાબરમતી સેન્ટ્રલ જેલને ગુનેગારોની નગરી કહેવામાં આવે છે. કહેવાય છે કે કોઈ પણ આરોપી જેલમાં જાય એટલે તે સુધરી જાય છે, પરંતુ આ વાત તદ્દન ખોટી છે, કારણ કે જેલમાં આરોપીઓ સુધરવાની જગ્યાએ વધુ ને વધુ ખૂંખાર બનીને બહાર આવે છે. સાબરમતી સેન્ટ્રલ જેલમાં જ્યારે કુખ્યાત ગોવા રબારી અને વિશાલ નાયકે ચેતન બેટરીની ઘાતકી હત્યા કરી ત્યારથી જ જેલ વિવાદિત બની ગઈ હતી. સાબરમતી સેન્ટ્રલ જેલ અનેક વિવાદોમાં ઘેરાયલી છે જેમાં સૌથી મોટો વિવાદ સુરંગ કાંડનો હતો. વર્ષ ૨૦૦૮માં અમદાવાદમાં થયેલા સિરિયલ બોમ્બ બ્લાસ્ટના કેસમાં સંડોવાયેલા આતંકવાદીઓએ સેન્ટ્રલ જેલમાં સુરંગ ખોદીને ભાગવાની કોશિશ કરી હતી. સુરંગકાંડ બાદ હાલ તો સાબરમતી સેન્ટ્રલ જેલનો જો સૌથી મોટો વિવાદ હોય તો તે અતિક અહમદે ચાર વર્ષ જેલમાં કરેલા જલસા વિશેનો છે.