હસ્તપ્રતોની જાળવણી કેવી રીતે કરાય?

અનેક જ્ઞાનભંડારોમાં પ્રાચીન હસ્તપ્રતો છે. ખાસ પ્રકારનાં લાકડાંના બોક્સમાં લાલ કપડાંમાં વીંટાળીને આ હસ્તપ્રતો રાખવામાં આવતી હોય છે. તેમાં પણ કોડાયની હસ્તપ્રતોની સ્થિતિ વધુ સારી છે. તેનું કારણ કોડાયનું હવામાન પણ કહી શકાય. અહીંનું તાપમાન કચ્છની અન્ય જગ્યા કરતાં ઓછું હોય છે

સૈકાઓ જૂની હસ્તપ્રતોની જાળવણી કરવી એ ખૂબ મહત્ત્વનું કાર્ય છે. અગાઉ થઈ ગયેલા જૈનાચાર્યોના અનુભવનો, તેમના જ્ઞાનનો 'ને તેમના શિક્ષણનો નિચોડ તેમાં હોય છે. તેમાં ઘણી વખત જે-તે સમયના સમાજનું પ્રતિબિંબ હોય છે, જે-તે સમયની ઘટનાઓના પડઘા પણ તેમાં હોય છે. આથી જો આજથી પેઢી હસ્તપ્રતો વાંચી શકે, સમજી શકે તો તેઓ પ્રાચીન જ્ઞાનથી અવગત થઈ શકે. હસ્તપ્રતોની જાળવણી માટે પહેલાં તો તેની સચિ બનાવવી પડે, જેમાં જે-તે ગ્રંથનું વર્ણન ને તેનું મહત્ત્વ સમજાવતી વિગતો તૈયાર મૂકવી પડે. ત્યાર બાદ તેની જાળવણી - સંરક્ષણ અને પુનઃસ્થાપનની કામગીરી કરવી પડે. આ કામ થયા પછી અનુવાદનું કામ શરૂ કરી શકાય. આ કામ પછી અનુવાદ પામેલી સંતોની વાણીને વિશ્વવ્યાપી બનાવવાની હોય છે. જેથી કરીને વિશ્વભરમાં ફેલાઈને જૈન સાહિત્ય અમરત્વ પ્રાપ્ત કરે.