રાષ્ટ્રીય રાજનીતિના પરિદ્રશ્ય પર નિર્ણાયક અસરકર્તા કર્ણાટકનો જનાદેશ

કોંગ્રેસ અને ભાજપ વચ્ચે સરખામણી કરીએ તો આ ચૂંટણીમાં કોંગ્રેસની આંતરિક એકતા ઊડીને આંખે વળગે તેવી હતી, તેની સામે ભાજપના નેતાઓ હતાશ અને વિખરાયેલા જોવા મળતા હતા

- સુધીર એસ. રાવલ

લોકશાહી દેશમાં ચૂંટણીઓ યોજાય અને હાર-જીત થતી રહે તે સ્વાભાવિક છે, પરંતુ પ્રત્યેક જનાદેશનો એક આગવો સંદેશ હોય છે. રાજનીતિમાં આવા સંદેશનું અર્થઘટન સૌથી વધુ મહત્ત્વ ધરાવે છે અને એટલે જ ચૂંટણીનાં પરિણામો બાદ રાજકીય પક્ષો, નેતાઓ, રણનીતિકારો, વિશ્લેષકો અને ચૂંટણીના તજજ્ઞો વિનાવિલંબે પરિણામોનું આંકડાકીય વિશ્લેષણ, અનેક પ્રકારનું મૂલ્યાંકન તથા જનાદેશના મૂક સંદેશનું અર્થઘટન કરવામાં મશગૂલ બની જાય છે. જનાદેશનો સંદેશ એવો શંખનાદ છે જે જાગ્રત પણ કરે છે અને ચેતવણી પણ આપે છે. એ પ્રેરિત પણ કરે છે અને દંડિત પણ કરે છે. ભારતની પરિપક્વ લોકશાહીનો પિંડ સમયે-સમયે થતી ચૂંટણીઓના આવા અનેક જનાદેશથી બંધાયો છે. કર્ણાટક વિધાનસભાની ચૂંટણીમાં જનતા જનાર્દને આપેલો તાજેતરનો જનાદેશ આ સંદર્ભમાં અત્યંત મહત્ત્વનો, ઐતિહાસિક અને ભારતના રાજકીય પરિદેશ્ય પર નિર્ણાયક સ્વરૂપે દૂરગામી અસરો ઉપજાવનારો સાબિત થશે તે નિશ્ચિત છે.