આજે, ‘ફાધર્સ ડે’ની.. વાત છે!!

કેટલાક પરિવારો હજી પણ સંયુક્ત જોઇન્ટ ફેમિલીમાં રહીને જીવતા હોય છે, કારણ કે કેટલાક ફાધરો પોતાના ઘરમાં રાજાશાહી શાસન ચલાવવાનું પસંદ કરતા હોય છે

- હર્ષદ પંડ્યા ‘ શબ્દપ્રીત’

આંતરરાષ્ટ્રીય ફાધર્સ ડેનું જ્યાં અને જેટલું મહત્ત્વ જોવા મળે છે એટલું મહત્ત્વ આંતરરાષ્ટ્રીય ‘પપ્પા વર્ષ’નું જોવા મળે ત્યારે સમજી જવાનું કે સમાજમાં ‘પપ્પા’ઓનો હેપિનેસ ઇન્ડેક્સ ઑલટાઇમ હાઈ થઈ ગયો છે!

રોમન કેથલિક ‘પોપ’ શબ્દ ધર્મગુરુ અથવા ‘હોલી-ફાધર’ રૂપે જ આવ્યો છે. જેઓ ‘બાપા’ કહેતાં શરમાયા એમણે ‘ફાધર’ કહેવાનું શરૂ કર્યું. ‘ફાધર’ કહેતાં ખચકાયા એમણે ‘પપ્પા’ કહેવાનું શરૂ કર્યું. ‘પપ્પા’ શબ્દ એટલો જ વિચિત્ર છે, જેટલો પપ્પા વિચિત્ર છે! આ શબ્દ સો ટકા ગુજરાતી છે, કેમ કે મૂળ લેટિન શબ્દ તો ‘પાપા’ હતો! આમેય ગુજરાતીઓ કરકસરમાં પહેલેથી જ માને! ગુજરાતીઓ જ કેમ, બોલિવૂડે પણ જુઓને પપ્પાનું પૂરી કંજૂસાઈથી ‘પા’ કરી જ નાખ્યું ને!

જૂન મહિનાનો ત્રીજો રવિવાર એટલે ફાધર્સ ડે! મધર્સ-ડે સહેજ ગંભીરતાથી, પણ ફાધર્સ-ડે તો Fool – મિજાજથી ઊજવાય છે. હમણાં અમેરિકાથી મિત્ર વિજય ઠક્કર (અમદાવાદ-દૂરદર્શનના (અ)ભૂતપૂર્વ ન્યૂઝ રીડર)નો ફોન આવ્યો ત્યારે મેં એમને પૂછેલું કે, અમેરિકામાં તો લોકો ફાધર્સડે ધામધૂમથી ઊજવતા હશે, ખરું ને? ત્યારે એમણે એ જ ખરજભર્યા – આષાઢી અવાજે કહ્યું, ‘‘હર્ષદભાઈ, અહીં મોટા ભાગના લોકો આ દિવસને ‘Fool Day’ તરીકે ઊજવે છે, એમાંય ખાસ કરીને આપણા દેશી કાળિયાઓ વધારે હોંશથી ઊજવે છે.’’

દેશ ગમે તે હોય –ફાધર તો બધે એક જ પ્રકારના હોય. આ સંદર્ભે નરસિંહ મહેતાના તત્ત્વદર્શક ભજનની પેલી કાવ્યપંક્તિ યાદ આવે છેઃ ‘ઘાટ ઘડિયા પછી નામ રૂપ જૂજવાં, અંતે તો  હેમનું હેમ હોયે!' હા, આકાર-વિકારમાં ફેર હોય, પણ અંતે તો ‘એમનું એમ’ જ હોય!

વિવિધ દેશોમાં ફાધર્સ-ડે કેવી રીતે ઊજવાય છે એની જાણકારી મારા બાબુ બૉસે પિતૃભક્ત સંતાનો માટે મેળવી છે, તે અહીં એટલા માટે પ્રસ્તુત છે કે કેટલાક પિતૃપરાયણ પુત્રોને એમાંથી પ્રેરણા મળી રહે!