ડ્રીમ પ્રોજેક્ટ!

અમારા આમ ભોળા બહુ.… મને એ ઘણીવાર કહે, હવે ચોથી વાર તારે મેટ્રિકની પરીક્ષા આપવી નથી. ભૂલથી જો પાસ થઈ જાય, તો સમાજના લોકોને પહોંચી ન વળાય

- હર્ષદ પંડ્યા ‘શબ્દપ્રીત’

અંગ્રેજી બોલનારને અંગ્રેજીમાં ‘બોલવાનો’ જે નશો હોય છે, એના કરતાં અધિકગણો નશો, કોઈકને એ અંગ્રેજી ‘સંભળાવવાનો’ વધારે હોય છે! નશો ‘બોલવામાં’ નથી, ‘સંભળાવવામાં’ હોય છે!

હમણાં એક નિયો મૉમ (નવી નવી મા બનેલી) પોતાના ત્રણેક વર્ષના ટાબરિયાને રમાડતી જાય અને અંગ્રેજીમાં જેવું આવડે, જેટલું આવડે એવું બોલતી જાય. કોઈએ એને પૂછ્યું, ‘બહેન, તમે અંગ્રેજીમાં બોલ્યા કરો છો, પણ આ ટાબરિયું થોડું કાંઈ સમજવાનો છે?’ ત્યારે આ નિયો મૉમે કહ્યું: “અત્યારે ભલે ને એ ન સમજે, પણ મારે એને આજથી જ અંગ્રેજી સાંભળતો અને આવતીકાલથી અંગ્રેજીમાં બોલતો કરી દેવો છે. નાનપણમાં હું ભલે અંગ્રેજી મીડિયમમાં ભણી શકી નહીં, મારે એને અંગ્રેજી મીડિયમમાં જ ભણાવવો છે, કેમ કે એ મારો ‘ડ્રીમ પ્રોજેક્ટ’ છે!’

કેટલાંક પૅરેન્ટ્સ પોતાનાં ટાબરિયાંને પોતાનો ‘ડ્રીમ પ્રોજેક્ટ’ સમજતાં હોય છે! આજે મોટા ભાગની ગુજરાતી મમ્મીઓ એમનાં ટાબરિયાંઓને બાલમંદિરમાં દાખલ કર્યા પછીના બીજા જ મહિને બાલમંદિરની શિક્ષિકાઓ અને પ્રિન્સિપાલ મૅડમ પાસે પોતાનાં ટાબરિયાંના શૈક્ષણિક વિકાસના રિપોર્ટ કાર્ડ્ઝની ઉઘરાણી કરતી થઈ જાય છે કે, આ અમારા પિન્ટુડાને તો હજુ ‘એ, બી, સી, ડી’ યે નથી આવડતી? આમ કેમ?

ત્યારે બાલમંદિરની મોટા ભાગની યંગ ટીચર્સ પોતાનું ટેમ્પરામૅન્ટ ગુમાવી દે, પણ એ બાલમંદિરનાં પ્રૌઢ બહેન એમના અનુભવોની ભાષામાં સમજાવે, ‘ના આવડે બહેન, સારું શીખતાં વાર લાગે.’

‘પણ ઘરમાં તો એના પપ્પાની સામે એ ‘અ, આ, ઈ, એ, ઉ, આં..’ જેવું બોલતો હોય છે!’

‘એના પપ્પાની હાજરીમાંને?’

‘હા.’

‘તો તો એવું જ બોલેને! પણ તમે ચિંતા ન કરો બહેન, અમારે ત્યાંનો સ્ટાફ એટલો બધો બિહામણો નથી કે તમારો ટિંચુ ‘અ, આ, ઈ, એ, ઉ, આં’ કરવા મંડી પડે. તમે ધીરજ રાખો બહેન, તમારા પિન્ટુને છ મહિના થવા દો.. એને એવું બધું અને એટલું બધું આવડી જશે કે તમને પણ અહીં દાખલ થઈ જવાનું મન થશે!’

‘તમે છ મહિનાની વાત કરો છો, પણ મારા પિન્ટુડાને તો ગયા મહિનાની ૨૯ તારીખે બે વરસ પૂરાંય થઈ ગયાં, એ કંઈછ મહિનાનો નથી મૅડમ.’