સ્ત્રી જન્મદરમાં ત્યારે જ વધારો નોંધાશે જ્યારે..

સરકાર તો દીકરીના જન્મદરને પ્રોત્સાહન આપવા માટે વિવિધ યોજનાઓ બહાર પાડતી રહેશે, પણ જો સરકાર પ્રયત્નો ન કરે - યોજનાઓ બહાર ન પાડે તો શું માતા-પિતાએ પોતાના બાળકને જન્મ આપવાની ફરજ ન નિભાવવી જોઈએ?

- હેતલ ભટ્ટ

કેગના તાજેતરના રિપોર્ટ પ્રમાણે રાજ્યના એક પણ જિલ્લામાં પુરુષો કરતાં સ્રી જન્મદર વધ્યો નથી. વર્તમાન સમયમાં ગુજરાતમાં ૧૦૦૦ દીકરાની સામે ૯૧૮ દીકરીઓનો જન્મ થાય છે. ટૂંકમાં, પુરુષ અને સ્ત્રી દરનો જે રેશિયો છે એમાં બહુ ફેરફાર નોંધાયો નથી. વર્ષ ૨૦૧૫માં બેટી બચાવો અભિયાન શરૂ કરવામાં આવ્યું ત્યારથી લઈને આજ દિન સુધી સ્ત્રી જન્મદરમાં બહુ ઉછાળો નોંધાયો નથી. આપણને આ સમાચાર વાંચીને પ્રશ્ન થાય કે ક્યાં-શું તકલીફ છે. સરકાર તો તેની રીતના પ્રયત્નો કરી રહી છે. સમાજની માનસિકતામાં પણ પરિવર્તન આવી રહ્યું હોવાનું જોવા મળી રહ્યું છે તો પછી શું ખૂટે છે. કયા કારણ છે જેને કારણે બાળકીઓના જન્મદ૨માં વધા૨ો નથી નોંધાઈ રહ્યો. તો વાત એમ છે કે સરકારને તો બાજુ પર મૂકી દો. બાળકને જન્મ આપવો એ માતાપિતાના હાથમાં છે, દીકરો હોય કે દીકરી. સરકાર તો દીકરીના જન્મદરને પ્રોત્સાહન આપવા માટે વિવિધ યોજનાઓ બહાર પાડતી રહેશે, પણ જો સરકાર પ્રયત્નો ન કરે - યોજનાઓ બહાર ન પાડે તો શું માતા-પિતાએ પોતાના બાળકને જન્મ આપવાની ફરજ ન નિભાવવી જોઈએ? માતા-પિતા બાળક સરકાર માટે નથી લાવતાં, પોતાના માટે લાવે છે. પોતાનો પરિવાર આગળ વધારવા, ખુશીઓને આવકારવા માટે બાળક જન્મ લે છે. હવે જો સરકાર તમારા કન્યા રત્નની જવાબદારી ન પણ લે તો તમે માતા-પિતા તરીકે તેની જવાબદારીમાંથી છટકી જવા ભ્રૂણ-હત્યા જેવો રસ્તો અખત્યાર કરો તે કેટલા અંશે વાજબી છે? હવે આખી વાતમાં સરકારને તો બાજુ પર જ મૂકી દો. આપણા બાળકનું નિર્વહન કરવાની, પાલનપોષણ કરવાની જવાબદારી આપણી હોય છે. દીકરો હોય કે દીકરી - ભેદભાવ રાખ્યા વગર પણ કેગનો રિપોર્ટ જોતાં એવું ફલિત થાય છે કે માતા-પિતાને પોતાને જ રસ ન હોય દીકરીને જન્મ આપવામાં તો હવે એમાં સરકાર પણ શું કરવાની. જે કરવાનું છે એ આપણે કરવાનું છે, પરિવાર અને સમાજની જવાબદારી નિભાવવાનું કામ.