અમેરિકન કોન્સ્યુલેટની નવી વેબસાઇટ

૨૯મી જુલાઈ, ૨૦૨૩ના ભારતમાં આવેલ અમેરિકન કોન્સ્યુલેટે જાહેરાત કરી કે, જેમની પાસે નોન-ઇમિગ્રન્ટ શ્રેણીના વિઝા હોય, જેની અવિધ પૂરી થઈ ગઈ હોય, તેઓ એ અવિધ પૂરી થયા પછી ૪૮ મહિનાની અંદર, એ જ પ્રકારના નોન-ઇમિગ્રન્ટ વિઝા મેળવવા માટે અરજી કરી શકે છે

- ડો.સુધીર શાહ

મહેસાણાના રોની જીવણલાલ પટેલે આજથી દસ વર્ષ પહેલાં પચીસ વર્ષની ઉંમરે અમેરિકાના નોન-ઇમિગ્રન્ટ શ્રેણીના બિઝનેસમેનો અને પર્યટકો માટેના બી-૧/બી-૨ વિઝા અરજી કરીને દસ વર્ષના મલ્ટિએન્ટ્રી વિઝા મેળવ્યા હતા. એ વિઝા ઉપર એ અમેરિકા છ વાર જઈ આવ્યો હતો. હવે વર્ષ ૨૦૨૩ના ગયા જુલાઈ મહિનામાં એના એ દસ વર્ષના મલ્ટિએન્ટ્રી બી-૧/બી-૨ વિઝાની અવધિ પૂરી થઈ ગઈ હતી. રોનીને આવતા વર્ષે ફેબ્રુઆરી, ૨૦૨૪ના મહિનામાં અમેરિકા કોઈ પણ હિસાબે જવું હતું, કારણ કે એનો અંગત મિત્ર જે વર્ષોથી અમેરિકામાં રહેતો હતો અને ગ્રીનકાર્ડ ધરાવતો હતો. એનાં લગ્ન હતાં. એટલું જ નહીં, એ જ સમયે એણે બાંધેલ નવા હાઉસમાં એ પ્રવેશવાનો હતો. સાથે-સાથે એણે જે ત્રીજી, ચાલીસ રૂમની મોટેલ ઊભી કરી હતી, એનું ઉદ્ઘાટન પણ હતું.

આમ, ત્રણ ત્રણ આનંદના પ્રસંગો એક સાથે ઊજવાતા હતા. રોનીને એના મિત્રએ ભાર દઈને જણાવ્યું હતું કે, જો એ એના આ ત્રણ પ્રસંગોમાં હાજર નહીં રહે તો એની જોડે એ કટ્ટી કરી નાખશે, દોસ્તી તોડી નાખશે. રોની આ કારણસર ફરી પાછા દસ વર્ષના મલ્ટિએન્ટ્રી બી-૧ બી-૨ વિઝા મેળવવા ઇચ્છતો હતો, પણ એ માટે એને ઇન્ટરવ્યૂની તારીખ જ મળતી નહોતી.