સૌંદર્ય જ નહીં, વ્યક્તિત્વને પણ નિખારે છે લિપસ્ટિક

ચહેરા પર કોઈ પણ પ્રકારના મેકઅપનો ઉપયોગ ન કર્યો હોય, પરંતુ ફક્ત લિપસ્ટિક એપ્લાય કરી હોય તો પણ તે સમગ્ર વ્યક્તિત્વને નિખારવાનું કામ કરે છે

આપણે ગમે તેટલા સુંદર તૈયાર થઈએ, પણ લિપસ્ટિક ન લગાવી હોય તો? કોઈ પણ મેકઅપ ન કર્યો હોય અને ફક્ત લિપસ્ટિક લગાવી હોય તો? બસ, આ જ કમાલ છે લિપસ્ટિકનો. મેકઅપની વાત આવે ત્યારે લિપસ્ટિક શો સ્ટોપર જેવું કામ કરે છે. તેના વગર મેકઅપ અધૂરો લાગે છે, આમ તો લિપસ્ટિક એ મહિલાઓના સૌંદર્યનો સામાન છે, પરંતુ કેટલીકવાર પુરુષો પણ લિપસ્ટિકનો ઉપયોગ કરતા હોય છે. ઉદાહરણ તરીકે લ્મિ એક્ટર, અમુક એન્કર વગેરે. પુરુષો જે લિપસ્ટિક લગાવે છે તે મેટ હોય છે. વિવિધ પ્રકારની લિપસ્ટિક બજારમાં ઉપલબ્ધ બની છે. મેટ, ગ્લોસી, શિયર વગેરે. ઘણી મહિલાઓને ક્રીમ લિપસ્ટિકના સ્થાને લિક્વિડ લિપસ્ટિક વાપરવાનું ગમે છે. મેટ, ગ્લોસી ઉપરાંત છેલ્લા કેટલાક સમયથી ક્રેયોન લિપસ્ટિક બજારમાં ઉપલબ્ધ બની છે. આ લિપસ્ટિક ક્રેયોન એટલે કે રંગની સ્ટિક જેવી જ દેખાય છે, પણ તે સાઇઝમાં મોટી હોય છે. આ લિપસ્ટિકને તમે હોઠ ઉપર બામની જેમ પણ લગાવી શકો છો. ક્રેયોન લિપસ્ટિક હોઠને મોઇશ્ચરાઇઝ રાખવાનું કામ કરે છે.