ખુશ અને કન્ફ્યુઝ કરવાનું કામ કરતાં કિડ્ઝ વેર

જે નિયમ મહિલાઓ અને પુરુષોના ફૅશન માર્કેટમાં લાગુ પડે છે એ જ નિયમ બાળકોની ફેશનમાં લાગુ પડે છે. અગાઉ બાબાસૂટ તરીકે જાણીતી ફૅશન આજે બાળકોના કિડ્સ વેરમાં ફરીથી ટ્રેન્ડ કરી રહી છે.

- હેતલ ભટ્ટ

ફૅશન ઇન્ડસ્ટ્રી અને સ્ટાઇલની વાત કરવામાં આવે ત્યારે જેટલું વૈવિધ્ય મહિલાઓ અને પુરુષોની ફેશન ઇન્ડસ્ટ્રીમાં જોવા મળે છે તેનાથી વધારે વૈવિધ્ય બાળકોની ફેશનમાં જોવા મળે છે. કિડ્સ એપરેલ, એક્સેસરિઝ, ફૂટવેરમાં સમયાંતરે નવી-નવી સ્ટાઇલ, પેટર્ન અને ટ્રેન્ડ્સ જોવા મળે છે. કિડ્સ ફેશન ઇન્ડસ્ટ્રી ખૂબ ઝડપથી વિસ્તરી રહી છે, પરિણામે ઘણીવાર માતા-પિતા કન્ફ્યુઝ થતાં જોવા મળે છે કે બાળકો માટે કયા આઉટફ્ટિની ખરીદી કરીએ અને કયા ના લઈએ. આ ઉપરાંત કિડ્સ વેર એટલા આકર્ષક રંગો અને પેટર્નમાં ઉપલબ્ધ હોય છે કે તેમને જોતાં જ એ લઈ લેવાનું મન થઈ જતું હોય છે. સામાન્ય રીતે બોય્ઝની સરખામણીમાં ગર્લ્સ ક્લોથ એન્ડ ફૂટવેરમાં ઘણું વૈવિધ્ય જોવા મળે છે. તેથી જ ઘણીવાર માતા-પિતા રમૂજી સ્વરમાં ફરિયાદ પણ કરતાં જોવા મળે છે કે છોકરીઓના ફ્રોક અને સ્કર્ટ-ટોપ કે સેન્ડલમાં જેટલું નાવીન્ય જોવા મળે છે એટલું નાવીન્ય છોકરાઓનાં કપડાં અને પગરખામાં નથી જોવા મળતું. ખેર, જે નિયમ મહિલાઓ અને પુરુષોના ફેશન માર્કેટમાં લાગુ પડે છે એ જ નિયમ બાળકોની ફેશનમાં લાગુ પડે છે અને એ છે જૂની ફેશન નવા રંગરૂપ સાથે ફરીથી ટ્રેન્ડ થવી. અગાઉ બાબાસૂટ તરીકે જાણીતી ફેશન આજે બાળકોના કિડ્સ વેરમાં ફરીથી ટ્રેન્ડ કરી રહી છે. જમ્પસૂટ અને ડંગરી પણ એ રીતે ફરીથી લોકપ્રિય બની રહી છે. ગર્લ્સ ફેશનમાં પોલકા ડોટ ફ્રોક અને ટોપ તેમ જ સ્કર્ટ ઓલટાઇમ ફેવરિટ રહી છે. એ જ રીતે છોકરાઓમાં શોલ્ડર બેલ્ટ સાથેના પેન્ટ અને શર્ટ હંમેશાંથી લોકપ્રિય રહ્યા છે.