જિસસ શ્યામ હતા કે શ્વેત?

જિસસ મૂળે કાળા નહીં, પણ ઘેરા ઘઉંવર્ણા હતા એવું ઘણા માને છે. સિસિલીના સિકુલિઆના ગામમાં વર્ષોથી જિસસની બ્લૅક મૂર્તિની યાત્રા કાઢવામાં આવે છે. રશિયામાં જિસસને કાળા દર્શાવતી કેટલીયે કૃતિઓ છે.

- ગૌરાંગ અમીન

બ્લેક બોર્ડ પર વ્હાઇટ ચોકથી લખેલું એ સત્ય કોઈકનું હશે ધોળા ડિજિટલ સ્ક્રીન પર કાળા ટાઇપમાં વાંચેલું કશે

જિસસ દેખાવમાં કેવા હતા? ગોરા હતા કે કાળા હતા? સાધારણ ભારતીયને આવા પ્રશ્ન ના થાય કેમ કે આપણા સામાન્ય જીવનમાં ચામડીનો રંગ નિર્ણાયક નથી હોતો. બાહ્ય સૌંદર્ય માટે જે માન્યતા હોય તે, જનરલી આપણી દૃષ્ટિ ત્વચાના વર્ણથી આપણા સંપર્કમાં આવતા માણસોને માપતી નથી. આખું જગત જાણે છે કે વિદેશમાં ગોરા ’ને કાળાનો ભેદ ખૂબ ઘેરો ’ને સદીઓ જૂનો છે. રંગભેદ કે વંશભેદ યુરોપ, અમેરિકા, ઓસ્ટ્રેલિયા વગેરે પ્રાંતમાં આમ છે. સફેદ લોકો ગમે તેટલું સફેદ જૂઠ બોલે, વ્હાઇટ-સુપ્રિમસીના અહંકાર જેવું કશું છે એ હકીકત છે. અંગ્રેજોના રાજમાં આફ્રિકા હોય કે ભારત, ધોળિયાઓએ અશ્વેત મનુષ્યોને નીચા 'ને નીચ ગણ્યા છે ’ને અગણિત વાર પશુ ગણ્યા છે. એવી હજારો વર્ષોની દાસ્તાનમાં ઑલમૉસ્ટ ૨૦૨૩ વર્ષ પહેલાં જન્મેલા મસીહા કોકેશ્યન કે વ્હાઇટ ન હતા એવું કેટલાંય લોકો વર્ષોથી માને છે. નેચરલી એ જમાનામાં ફોટોગ્રાફી ન હતી, તેથી સચ્ચાઈ જાણવામાં ઘણી ગૂંચ પડે. જિસસના કોઈ શારીરિક વારસદાર નથી, બાકી હોત તો એમના જનીન પરથી પણ ઘણું જાણી શકાયું હોત. તેવામાં જિસસ ગોરા નહોતા એવો દાવો  કરનારા ખોટા છે તેવું માનવું સહજ નથી એ સમજી શકાય છે.

દુનિયામાં જે કોઈ ખ્રિસ્તી નથી તેવા ધાર્મિકને પાંચ તસવીર બતાવી કહો કે આમાંથી જિસસ કોણ? તો એ સંભાવના પાકી છે કે અપવાદ સિવાય સૌ કોઈ ‘જિસસ’ ઓળખી બતાવે. કેમ કે જિસસનું રૂપ એટલું બધું જાણીતું બનાવવામાં આવ્યું છે. જિસસનો એ આકાર અને રંગ સબકોન્સિયસમાં પણ સજ્જડ રીતે સેટલ થઈ ગયો હોય એમ આપણને અન્યથા વિચારવા માં શાયદ તકલીફ પડે. બેશક જેમને જિસસનો ઉપદેશ પાળવામાં અને ખ્રિસ્તી ધર્મમાં જેને ગોડ કહ્યા છે તેમને પ્રસન્ન કરવા કે પામવામાં જ રસ હોય તેમના માટે જિસસનું બાહ્ય રૂપ ખાસ મહત્ત્વનું નથી રહેતું. બાઇબલ પ્રત્યક્ષ રીતે જિસસની સ્કિનના કલર અંગે કશું કહેતું નથી. કહેવાય છે કે જિસસ યહૂદી કે હિબ્રૂ હતા. કોઈ દૃષ્ટિથી એ ત્યારના પેલેસ્ટાઇનના હતા અને કોઈ દૃષ્ટિથી એ ત્યારના ઇઝરાયલના હતા, સ્મરણમાં રહે કે મહંમદ સાહેબનો જન્મ થયો તેનાં વર્ષો પહેલાંની આ વાત છે. બહુ બધાં માને છે કે જિસસ સિમીટિક વંશના હતા.