સ્થાપત્ય-વિચાર – હેમંત વાળા

આર્ટ-સાયન્સ મ્યુઝિયમ - સિંગાપુર કળાત્મક રીતે ખીલતું કમળ

- હેમંત વાળા

કળાની સાચવણી માટે વિજ્ઞાન જરૂરી છે અને વિજ્ઞાનની સ્વીકૃતિ માટે વિજ્ઞાનની રજૂઆતમાં કળાત્મકતા જરૂરી છે. આમ પણ માનવ જીવનમાં જેટલું કળાનું મહત્ત્વ છે તેટલું વિજ્ઞાનનું પણ છે. કળાએ માનવીના જીવનની ગુણવત્તા જે રીતે સુધારી છે તેવી જ રીતે વિજ્ઞાને પણ આ ગુણવત્તામાં પોતાનો ફાળો આપેલો છે. માનવ જીવનમાં કળા અને વિજ્ઞાન, બંનેનું સહ અસ્તિત્વ સતત જોવા મળે છે. આવા સહ અસ્તિત્વને ‘સેલિબ્રેટ’ કરતું મકાન એટલે સિંગાપોરનું આર્ટ-સાયન્સ મ્યુઝિયમ. અહીં કળાત્મકતાને વ્યક્ત કરવા વિજ્ઞાનનો સહારો લેવાયો છે અને વિજ્ઞાનની બાબતો વર્ણવવા માટે કળા સાધન બની રહે છે. સિંગાપુરમાં સ્થપતિ મોસે સાદી દ્વારા સન ૨૦૧૧માં બનાવાયેલ આ મ્યુઝિયમની રચના જાણે કળા અને વિજ્ઞાનના સમન્વય સમાન છે.