એનાલિસિસ

રાજા તરીકે ભરત પાસે ભગવાન રામની શી અપેક્ષાઓ હતી?

- સુધીર એસ. રાવલ

અયોધ્યામાં ભગવાન રામના ભવ્ય રામમંદિરના ઉદ્ઘાટન અને રામલલ્લાની નવી પ્રતિમાની પ્રાણપ્રતિષ્ઠાનું પવિત્ર કાર્ય સંપન્ન થઈ ગયું છે. મંદિરના ગર્ભગૃહમાં વડાપ્રધાન નરેન્દ્ર રાજ્યપાલ આનંદીબહેન પટેલ, ઉત્તર પ્રદેશના મુખ્યમંત્રી યોગી આદિત્યનાથ, શ્રીરામ જન્મભૂમિ તીર્થક્ષેત્ર ટ્રસ્ટના પ્રમુખ મહંત નૃ ત્યગોપાલદાસ તથા રાષ્ટ્રીય સ્વયંસેવક સંઘના સરસંઘચાલક મોહન ભાગવત હાજર રહ્યા હતા. પ્રાણપ્રતિષ્ઠાના આ ભવ્ય સમારંભમાં દેશભરમાંથી અગ્રણી સંતો, મહંતો, ધર્મગુરુઓ, ઉદ્યોગપતિઓ, કલાકારો, રમતવીરો, રાજકીય નેતાઓ, કાર્યકર્તાઓ, સામાજિક આગેવાનો સહિત અનેક ભાવિક ભક્તો હોશભેર હાજર રહ્યા હતા. વડાપ્રધાને પ્રસંગને અનુરૂપ તેમના સંબોધનમાં કહ્યું કે, ‘હવે આપણે દેશવાસીઓએ આ ક્ષણે જ સમર્થ, સક્ષમ, ભવ્ય, દિવ્ય ભારતના નિર્માણ માટે સોગંદ લેવાના છે. આપણી ચેતનાનો વિસ્તાર રામથી રાષ્ટ્ર સુધી કરવાનો છે. હનુમાનજીની સેવા અને સમર્પણ એવા ગુણ છે, જે આપણે બહાર ક્યાંય શોધવા નથી પડતા. પ્રત્યેક ભારતીયમાં ભક્તિ, સેવા અને સમર્પણના ભાવ ભારતના વિકાસનો આધાર બનશે. પ્રાચીન કાળથી દેશના દરેક ખૂણામાં લોકો રામના રસનું આચમન કરે છે.’

પ્રાણપ્રતિષ્ઠા સમારંભ પૂરો થયા પછી રામમંદિરની બહાર હાજર હજારો મહેમાનો પર આર્મી હેલિકૉપ્ટરથી ફૂલોનો વરસાદ કરવામાં આવ્યો હતો. મંદિર પરિસરમાં હાજર ૧૨૦૦૦થી વધુ આમંત્રિત મહેમાનોએ જય શ્રીરામના જયઘોષથી વાતાવરણ ગજવી દીધું હતું. સૂર્યોદયથી લઈને સમગ્ર દિવસ દરમિયાન અને મોડી રાત્રિ સુધી સમગ્ર દેશમાં રામ નામનો અનોખો ઉત્સવ ઊજવાતો રહ્યો, જાણે પ્રભુ શ્રીરામ ધરતી પર સ્વયં પધાર્યા હોય!