અમે કોઈ પણ કામ કરવા સક્ષમ છીએ, બસ, તમે અમને એક તક આપો

અહીં મહિલા કામદારો મૅનેજમૅન્ટ, ફર્નેસ ઓપરેટર, પ્રોજેક્ટ કો-ઓર્ડિનેટર, સિક્યૉરિટી માર્શલ્સ, પ્રોજેક્ટ ઑપરેશન્સ, કોન્ટ્રાક્ટ પ્રોક્યોરમૅન્ટ, લોજિસ્ટિક્સ વિભાગ જેવા વિવિધ ક્ષેત્રે કામ કરે છે. એટલે કે માત્ર ઑફિસ વર્ક જ નહીં, મહિલા કામદારો એ બધાં જ કામ કરે છે જે કંપનીના પુરુષ કામદારો કરે છે. વાત એક સ્ટીલ કંપનીનાં મહિલા કર્મચારીઓની.

- જિજ્ઞાસા સોલંકી

એન્જિનિયરિંગમાં ગોલ્ડ મેડાલિસ્ટ છું છતાં એક મહિલા હોવાને કા૨ણે નોકરી મેળવવામાં મને મુશ્કેલી પડી રહી છે. જો મહિલાઓને શિક્ષણ અને નોકરીની તકો ન મળે તો સમાજ કે દેશ ક્યારેય ઊંચો નહીં આવે. આ તમારી કંપનીની એક ભૂલ છે.' આ શબ્દો છે, સામાજિક કાર્યકર સુધા મૂર્તિના, જેમણે જેઆરડી ટાટાને પત્ર લખી પોતાની બહાદુરીનો પરિચય આપ્યો હતો.

એક ઇન્ટરવ્યૂમાં તેમણે કહ્યું હતું કે, ‘૧૯૭૪માં હું ટાટા ઇન્સ્ટિટ્યૂટ બેન્ગ્લોરમાં એમ.ટેક. કરી રહી હતી. ક્લાસમાં હું એકમાત્ર છોકરી હતી. મેં ૧૯૭૨માં BE કર્યું હતું, તે વર્ષે પણ બધા વિદ્યાર્થીઓમાં હું એકમાત્ર છોકરી હતી. એક દિવસ હું મારી હોસ્ટેલમાં પાછી ફરી રહી હતી ત્યારે નોટિસ બોર્ડ પર ટેલકો પુણેમાં યુવાન, તેજસ્વી એન્જિનિયરોને સારા પગાર સાથે નોકરી ઑફર કરતો પત્ર વાંચ્યો. તેમણે અંતે એવો ઉલ્લેખ કર્યો હતો કે મહિલા વિદ્યાર્થીઓએ અરજી કરવાની જરૂર નથી. તેનાથી મને ખૂબ ગુસ્સો આવ્યો. હું ૨૩ વર્ષની હતી, એ ઉંમરે એમ પણ વધુ ગુસ્સો આવતો હોય છે. આથી મેં જેઆરડી ટાટાને પત્ર લખ્યો.