વિઝા વિમર્શ

ઇન્ટરનેશનલ ઇંગ્લિશ લેંગ્વેજ ટેસ્ટિંગ સિસ્ટમ

- ડો.સુધીર શાહ

અમેરિકાની યુનિવર્સિટીમાં ભણવા જવું હોય તો અંગ્રેજી ભાષા બરાબર આવડે છે એવું પરદેશી વિદ્યાર્થીઓએ દેખાડી આપવાનું રહે છે અને એ માટે એમણે ઇન્ટરનેશનલ ઇંગ્લિશ લેંગ્વેજ ટેસ્ટિંગ સિસ્ટમ' જેને આપણે સૌ ટૂંકામાં આઇલ્ટસ કહીએ છીએ એની પરીક્ષા આપવાની રહે છે. આ પરીક્ષામાં જેટલા વધારે બેન્ડ પ્રાપ્ત થાય એટલી અમેરિકાની યુનિવર્સિટીમાં પ્રવેશ મેળવવાની લાયકાતોમાં વધારો થાય છે.

આઇલ્ટસની પરીક્ષામાં ચાર આવડતો દેખાડી આપવાની રહે છે. એ આવડતો છે લિશનિંગ એટલે કે સ્મરણશક્તિ, સ્પીકિંગ એટલે કે વાતચીત કરવાની ત્રેવડ, રાઇટિંગ એટલે કે લખવાની આવડત અને રીડિંગ એટલે કે વાંચવાની કુનેહ. આઇલ્ટસ સિવાય ટોફેલ અને અન્ય પરીક્ષાઓ પણ અંગ્રેજી ભાષા આવડે છે એ દેખાડવા માટે આપી શકાય છે, પણ ભારતીયો અને એમાં ખાસ કરીને ગુજરાતના વિદ્યાર્થીઓ આઇલ્ટસની પરીક્ષા આપવાનું વધુ પસંદ કરે છે, કારણ કે એમના મતે અન્ય પરીક્ષાઓ કરતાં આઇલ્ટસની પરીક્ષા સહેલી છે.

રાઇટિંગની પરીક્ષા એક કલાકની હોય છે. એમાં બે જુદી-જુદી લખવાની પરીક્ષાઓ હોય છે. દોઢસો શબ્દો અને વીસ મિનિટનો ટાસ્ક વન હોય છે અને અઢીસો શબ્દો અને ચાલીસ મિનિટનો ટાસ્ક ટુ હોય છે.

સ્પીકિંગની પરીક્ષા અગિયારથી ચૌદ મિનિટની હોય છે. એમાં એક્ઝામિનરો વિદ્યાર્થીઓનો રેકોર્ડેડ ઇન્ટરવ્યૂ લે છે. એ ઇન્ટરવ્યૂના ચારથી પાંચ મિનિટના ત્રણ જુદા જુદા ભાગો હોય છે.