પ્રવાસન

ચંબા વેલીનો ચાર્મ, ડેલહાઉસી

- રક્ષા ભટ્ટ

ફાગણ અને ચૈત્રમાં ફેલાયેલા વસંતના વૈભવ પછી હવે ધીમે-ધીમે ચૈત્ર ઊતરતા ગરમીનો પારો ચઢતો જાય છે અને વૈશાખ આવતાં તો ગરમીનો પારો ચરમસીમાએ પહોંચશે.

વર્ષના આવા ભઠ્ઠી જેવા દિવસોમાં ઉત્તર પ્રદેશની ઉપર રહેલા ઉત્તરાખંડ કે હિમાચલ પ્રદેશ જતાં રહી અસહ્ય ગરમીના કાળઝાળ દિવસોમાંથી થોડા દિવસોને ઠંડા કરી શકાય, પરંતુ જવું તો જવું ક્યાં અને કેવી રીતે જવું એ મોટો પ્રશ્ન હોય છે.

જો હિમાચલ પ્રદેશ પર જ પસંદગીનો કળશ ઢોળવો હોય તો ચંબા વેલીમાં સ્થિત ડેલહાઉસી જવા જેવું છે, કારણ કે તે તેનાં સ્વર્ગીય દશ્યફલકો, લીલાંછમ મેદાનો અને બ્રિટિશરો વખતના કોલોનિયલ ભૂતકાળને સાચવીને બેઠેલું હિલ સ્ટેશન છે.

પ્રકૃતિનો ખુશનુમા સ્પર્શ કરાવતું આ ટ્રેન્ડિ ડેસ્ટિનેશન ચંબા જિલ્લામાં આવેલું છે. ૧૮૪૮થી ૧૮૫૬ સુધી ભારતના ગવર્નર જનરલ રહી ચૂકેલા ‘ધ અર્લ ઑફ ડેલહાઉસી’ પરથી ડેલહાઉસી નામ ધારણ કરનાર આ નગર કુલ પાંચ ટેકરીઓ પર સ્થિત છે અને સી લેવલથી ૬, ૪૬૦ ફૂટ ઊંચું છે.

ભેજવાળી ઉપઉષ્ણકટિબંધીય આબોહવા ધરાવતાં ડેલહાઉસીમાં ઉનાળો ઊતરતા મુશળધાર વરસાદ વરસે છે અને શિયાળામાં નેવું-નેવું દિવસ સુધી ઠરીને ઠીકરું થઈ જતું ડેલહાઉસી એપ્રિલ-મેમાં તેર ડિગ્રીથી ત્રેવીસ ડિગ્રીની વચ્ચે, ફરવા આવેલા પ્રવાસીઓને, ચિત્રમયી નજારો પીરસે છે.

શિવાલિકથી શરૂ થઈ કાંગરા અને મંડીની ઉત્તરે પહોંચતી ધૌલાધાર નામની ૨૯,૦૩૦ ફૂટ ઊંચાઈ ધરાવતી પર્વતમાળાની ઉત્તરે રહેલી ચંબા વેલીનું આ હિલ સ્ટેશન વિક્ટોરિયન સ્થાપત્ય, બ્રિટિશ રાજ વખતનાં દેવળો અને પાઇન, ઑક અને દેવદારનાં વૃક્ષોનો લીલો જલસો તો ધરાવે જ છે, પરંતુ તે સાથે જ તે રોડોડ્રેન્ડ્રોનનું મનોહર ફ્લાવરિંગ પણ ધરાવે છે, જે અહીં ઉનાળો ગાળવા આવતાં પ્રવાસીઓને ડેલહાઉસીનો રંગીન મિજાજ પણ પીરસે છે.

કઠલૌન્ગ, પોટ્રેન, તેહરા, બકરોટા અને બલુન નામની પાંચ ટેકરીઓ પર સ્થિત આ ડેલહાઉસી ચંબલ જિલ્લાનું પ્રવેશદ્વાર તો છે જ, પરંતુ તે ઉપરાંત અહીં આવતા એડવેન્ચર સ્પોર્ટ્સના શોખીનોનું પણ ચહિતું હિલ સ્ટેશન છે, કારણ કે અહીં માત્ર હજા૨-પંદરસોમાં રાવી નદીમાં રિવર રાફ્ટિંગની મજાની સાથે-સાથે આસપાસનાં પર્વતીય દશ્યફલકોને મનભરીને જોવાની પણ એક અલગ જ મજા છે.