વિઝા વિમર્શ,

એફ-૧ સ્ટુડન્ટ વિઝા સ્ટેપ બાય સ્ટેપ

- ડૉ.સુધીર શાહ

એક સમય એવો હતો જ્યારે ભારતમાં આવેલ નાલંદા અને તક્ષશિલા આ વિદ્યાપીઠોમાં ભણવા છેક ચીનમાંથી વિદ્યાર્થીઓ આવતા હતા. આજે આપણા અનેક વિદ્યાર્થીઓ વધુ અભ્યાસ માટે પરદેશ જાય છે અને એમનું લક્ષ અમેરિકાની યુનિવર્સિટીઓ હોય છે. અમેરિકામાં આજે સંખ્યાબંધ, એમ કહોને કે લગભગ એક હજારથી વધુ યુનિવર્સિટીઓ છે. અમેરિકાની યુનિવર્સિટીઓ ઉચ્ચ અભ્યાસ માટે પંકાયેલી છે, પણ આ બધી જ યુનિવર્સિટીઓ કંઈ નંબર વન નથી. એમાં થોડીક યુનિવર્સિટીઓમાં જ ભારત કરતાં વધુ સારું શિક્ષણ પ્રાપ્ત થાય છે. જો કોઈ ભારતીય વિદ્યાર્થીએ અમેરિકામાં ભણવા જવું હોય તો એણે નીચેનાં પગલાં લેવા જોઈએ.

૧) અમેરિકાની યુનિવર્સિટીઓમાં શિક્ષણ અંગ્રેજીમાં અપાય છે, આથી ત્યાં ભણવા જવા ઇચ્છતા ભારતીય વિદ્યાર્થીઓ અંગ્રેજી ભાષામાં પારંગત હોવા જોઈએ. ફક્ત ‘ટૉફેલ' કે ‘આઇલ્ટસ’ની પરીક્ષામાં સારા ગુણાંક આવે એ પૂરતું નથી. વિદ્યાર્થીઓ અંગ્રેજી ભાષામાં બરાબર વાતચીત કરી શકે, અંગ્રેજીમાં બોલાતું બરાબર સમજી શકે એવું એમનું અંગ્રેજીનું જ્ઞાન હોવું જોઈએ. આથી અમેરિકા ભણવા જવાની ઇચ્છા ધરાવતા દરેકે દરેક ભારતીય વિદ્યાર્થીઓએ સૌપ્રથમ અંગ્રેજી ભાષા ઉપર પ્રભુત્વ મેળવવું જોઈએ.