રાજકાજ

વડાપ્રધાનના પ્રવચન સમયે ઊહાપોહની હરકત યોગ્ય નથી

- ચાણક્ય

અઢારમી લોક્સભા સાથે સંસદનું સત્ર ચાલી રહ્યું છે. લોકસભામાં વિપક્ષોની સભ્ય સંખ્યામાં વધારો થતાં તેમનામાં આત્મવિશ્વાસ અને ઉત્સાહ છલકાતો જોવા મળે છે. નવા ચૂંટાયેલા સભ્યોની લોકસભામાં શપથવિધિ બાદ સ્પીકરની ચૂંટણી અને એ પછી સંસદનાં બંને ગૃહોની સંયુક્ત બેઠકને રાષ્ટ્રપતિના સંબોધન બાદ રાષ્ટ્રપતિના સંબોધન માટે આભાર પ્રસ્તાવ પરની ચર્ચા પણ એકંદરે ઘણી સારી રહી. શાસક અને વિપક્ષ -બંને છાવણીમાં પહેલીવાર ચૂંટાઈને આવેલા કેટલાંક સભ્યોનાં પ્રવચનો પણ પ્રમાણમાં સારાં રહ્યાં. રાહુલ ગાંધી સત્તાવાર રીતે વિરોધપક્ષના નેતા બન્યા છે. આભાર પ્રસ્તાવ પરની ચર્ચા દરમિયાન તેમના પ્રવચનમાં આધારહીન અને તથ્યવિહીન વિધાનો અશોભનીય બની રહે છે. તેમના પ્રવચન દરમિયાન પાંચ પ્રધાનોએ તેમના વિભાગો સંબંધિત રાહુલનાં વિધાનો અંગે દરમિયાનગીરી કરવી પડી. ફરજ દરમિયાન શહીદ થયેલા અગ્નિવીર જવાનને કોઈ વળતર નહીં મળ્યા અંગેની વાતને તો જવાનના પરિવારે જ રદિયો આપીને કહ્યું છે કે તેમને એક કરોડ ઉપરાંતની કુલ રકમ મળી છે. જવાબદારી સાથે પરિપક્વતાના તકાજાને પણ રાહુલ ગાંધીએ સમજવો રહ્યો.